Namdia se hoof glo onbevoeg

Namibia Desert Diamonds (Namdia) se uitvoerende hoof staar interne weerstand halfpad deur haar ampstermyn in die gesig, nadat verskeie werNamdia se CEO &#039;onbevoeg&#039;knemers daarop aangedring het dat sy weens beweerde onbevoegdheid uit die pos verwyder moet word.Haar onbevoegdheid het die maatskappy na bewering meer as N$230 miljoen in verlore inkomste gekos. Die gegriefde werknemers het in ’n brief aan die maatskappy se direksie beweer Amupolo is nie geskik om die maatskappy te lei nie en dat diamantverkope en internasionale verhoudinge met globale diamantmaatskappye verbrokkel het.Amupolo, wat uit ’n media-agtergrond kom, sukkel glo om haar voete in die hoogs mededingende en ietwat gefragmenteerde globale diamantarena te vind, met bewerings dat sy nie ’n begrip van die bedryf en die nodige vaardighede het nie.Sy was voorheen die uitvoerende hoof van Powercom, ’n filiaal van Telecom Namibia. Namdia het Amupolo egter verdedig en gesê sy is ’n deursigtige leier onder wie se leierskap die maatskappy ’n wins kon toon ondanks die onstabiele diamantmark.In die brief wat ’n week gelede aan die direksie gestuur is, sê werkers in die bedingingseenheid wat deur die Mynwerkersunie van Namibië (MUN) verteenwoordig word, Amupolo se optrede het daartoe gelei dat die maatskappy se finansiële situasie van ’n florerende posisie tot die punt gelei het waar die maatskappy nie meer kan bekostig om diamante aan te koop om aan sy globale kliënte te verkoop nie. “Binne ’n jaar en ’n half het die maatskappy van ’n miljarddollar-entiteit tot ’n hand-tot-mond-bedryf geval wat duidelik op wanbestuur dui en wat tot die sluiting van die maatskappy kan lei,” aldus die brief. Daar was glo periodes waarin geen aankope of verkope gedoen kon word nie, omdat Namdia nie kon bekostig om diamantpakkies by Namibia Diamond Trading Company (NDTC) af te haal nie.Volgens die werknemers kon Namdia teen die einde van 2023 en die begin van 2024 nie drie besendings aankoop nie, wat daartoe gelei het dat niks in dié tyd verkoop is nie. In sommige gevalle is pakkies glo teen ’n verlies verkoop, terwyl ander pakkies wat vir Namdia bestem was, na hul mededingers aangestuur is.Na wat verneem word, is Namdia geregtig op ten minste 10 pakkies vanaf NDTC per jaar. In 2024 is vier pakkies glo reeds verbeur, terwyl minder as die helfte van die pakkies verlede jaar gekoop is. Sodra Namdia die pakkies by NDTC koop, word dit dan aan sy kliënte verkoop.Bewerings word ook gemaak dat Amupolo met verkope inmeng deur te dikteer met watter kliënte Namdia sake moet doen.Dit het glo daartoe gelei dat die maatskappy verlede jaar meer as US$8 miljoen (N$146 miljoen teen die huidige wisselkoers) verloor het. Dié syfer staan glo vanjaar op sowat US$5 miljoen (N$91 miljoen). Namdia het ’n kliëntebasis van ongeveer 35 kopers.“Ons verstaan almal dat Namdia slegs volhoubaar kan wees as aankope by NDTC gedoen word en daar gevolglike verkope is. “Die uitvoerende hoof se strategie om voorraad op te gaar het aansienlike finansiële verliese vir die maatskappy tot gevolg gehad en wat moontlik tot die sluiting en verlies van inkomste vir baie families kan lei,” sê die gegriefde werknemerns in die brief.“Ons glo die huidige hoof is nie in staat om die maatskappy tot groter sukses te lei nie. Dit is in teenstelling met die missie van haar voorgangers en die oorspronklike Namdia-personeel.”Amupolo het Kennedy Hamutenya as hoof van die maatskappy vervang. Amupolo, wie se termyn in 2027 verstryk, is ook daarvan beskuldig dat sy Namdia se kliënte vervreem deur na bewering by verskeie geleenthede te weier om met hulle te vergader.Bronne in die binnekring beweer ook dat die verhoudinge tussen die werkers en Amupolo kort ná haar aanstelling versleg het. “Ons het verskeie kwessies met haar bestuurstyl geïdentifiseer wat tot werksonsekerheid en ontevredenheid in die werkplek gelei het. “Namdia is gestig om die pryse van Namibië se ongeslypte diamante, ’n hoëwaarde-kommoditeit, te bepaal.“Onder haar leierskap het die maatskappy egter in sy kernbedryf gesukkel, met tye waarin geen aankope of verkope gemaak is nie,” lui die brief. Die werknemers beskuldig Amupolo ook daarvan dat sy haar bedrywighede mikrobestuur, wat tot teenkanting en ’n gebrek aan vertroue in haar aan die kant van die bestuurspan gelei het.Amupolo het by navraag alle vrae na die maatskappy se woordvoerder, Beverley Coussement, verwys. Coussement het in haar reaksie gesê nóg die direksie nóg die bestuur het die brief ontvang waarin werknemers hul wantroue teenoor die uitvoerende hoof uitgespreek het. “Tot op hede het die direksie en bestuur nie die beweerde mosie van wantroue of enige ander bewerings, mondelings of skriftelik, ontvang nie,” het sy gesê.“Namdia het ’n interne proses vir griewe wat personeel aangemoedig word om te gebruik en wat, soos bepaal deur die maatskappybeleid, daarop gemik is om ’n produktiewe en vreedsame werksomgewing te bevorder wat deur deursigtigheid ondersteun word,” het Coussement gesê. “Dit is belangrik om te beklemtoon dat die diamantbedryf onderhewig is aan seisoenaliteit en veranderende marktoestande.”– republikein@republikein.com.na

Namdia se hoof glo onbevoeg

Kommentaar

Republikein 2026-05-05

Meld asseblief aan om kommentaar te lewer

Namdia se hoof glo onbevoeg

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.