N$260 m. uit rampfonds kan nie verklaar word

Ogone Tlhage - Die ouditeur-generaal, Junias Kandjeke, het ’n prentjie van die land se wankelende finansiële sake geskets – insluitend hoe die oorsprong van honderde miljoene nie verklaar kan word nie en fondse vir onbedoelde doeleindes gebruik is.Die Nasionale Noodfonds vir Rampverligting, wat onder die kantoor van die eerste minister val, was nie in staat om inbetalings van meer as N$260 miljoen in die fonds te verduidelik nie, aangesien geen papierspoor met betrekking tot die betaling van hierdie geld bestaan nie. “Die ouditeure het transaksiebedrae van N$210 miljoen (2014), N$52 miljoen (2015) en N$1,1 miljoen (2017) van die algemene grootboek na die bankstate opgespoor; hierdie transaksies kon egter nie geverifieer word nie aangesien geen stawende dokumentasie verskaf is nie,” het Kandjeke gesê.Ten spyte daarvan dat dié fonds op die been gebring is om die regering se pogings te finansier om rampe te bestuur, het dié fonds herhalende tekorte ondervind, met die laaste surplus wat in 2016 aangeteken is. Dit luidens die ouditeur-generaal se verslag oor die fonds se bedrywighede vir 2014, 2015, 2016 en 2017.TEKORT OP TEKORT Die regering het in 2014 N$409 miljoen in die fonds ingepomp. Dit was egter onvoldoende om sy bedrywighede te dek, en hy het daardie jaar ’n tekort van N$42,3 miljoen aangeteken. Dit weens sy uitgawes, wat altesaam N$466 miljoen beloop het.Die fonds het in 2015 nog ’n tekort van N$9,3 miljoen aangemeld, ondanks ’n inspuiting van N$130 miljoen deur die staat. Vir daardie jaar het uitgawes altesaam N$152 miljoen beloop.Die fonds kon in 2016 ’n surplus van N$326 miljoen aanteken as gevolg van ’n aansienlike staatsubsidie van altesaam N$650 miljoen en skenkings ten bedrae van N$51,8 miljoen, wat voldoende was om sy uitgawerekening van N$382 miljoen vir daardie jaar te dek.Nog ’n tekort van N$317 miljoen is in 2017 aangeteken toe hy ’n kontantinspuiting van N$135 miljoen in die vorm van ’n staatsubsidie, N$76 miljoen aan skenkingsinkomste en N$16,7 miljoen aan finansieringsinkomste ontvang het – aansienlik laer as sy bedryfsuitgawes van N$545 miljoen.’n Uiteensetting van sy skenkingsinkomste toon dat die plaaslike bydraes tot die fonds in 2017 altesaam N$19 miljoen beloop het, met N$55 miljoen wat van buitelandse skenkers gekom het. Die fonds het ook N$740 500 van die Suider-Afrikaanse Ontwikkelingsgemeenskap (SADC) se streekkwesbaarheidbepaling en -analisefonds ontvang.– republikein@republikein.com.na

N$260 m. uit rampfonds kan nie verklaar word

Kommentaar

Republikein 2025-06-18

Meld asseblief aan om kommentaar te lewer

N$260 m. uit rampfonds kan nie verklaar word

Kommentaar

Republikein 2025-06-18

Meld asseblief aan om kommentaar te lewer

MELD AAN

Advertensie