Kommissie mis sperdatum

President Nangolo Mbumba het in April die kommissie vir die afbakening van grense aangestel en hulle drie maande gegee om ’n verslag saam te stel. Ongeveer vyf maande later het Mbumba se kantoor egter steeds nie die verslag ontvang wat hy beloof het om openbaar te maak nie. Die kommissie is verantwoordelik vir die bepaling van die grense en name van streke, kiesafdelings en plaaslike owerhede.Toe die kommissie se voorsitter, waarnemende regter Peter Unengu, gister om kommentaar hieroor genader is, het hy gesê hy kan nie besonderhede oor die verslag bespreek nie. Hy wou ook nie vrae beantwoord oor die vordering van die verslag en waarom die kommissie nie die president se sperdatum van drie maande kon haal nie. “Dis ’n baie moeilike vraag. Ek kan jou nie daardie antwoord gee nie. Ek is so jammer as dit die inligting is wat jy gesoek het, ek kan nie,” het Unengu kortliks geantwoord.Die presidensiële woordvoerder, Alfredo Hengari, het gister alle vrae oor die verslag na die kommissie verwys, maar hy het bevestig dat die president se kantoor nog nie die verslag ontvang het nie.Met Namibië wat op die vooraand is van die presidensiële en Nasionale Vergaderingverkiesings in November sowel as volgende jaar se streek- en plaaslike owerheidsverkiesings, help die verslag die Verkiesingskommissie van Namibië (ECN) sover dit grense, kiesafdelings en streke betref.Netwerk Media Hub (NMH) het vroeër berig oor verskeie raadslede van kiesafdelings wat na hul gemeenskappe teruggestuur is om behoorlike gesprekke oor die afbakening van grense te voer. Dit het gevolg nadat die kommissie onvolledige verslae van veronderstelde konsultasies met gemeenskappe ontvang het. In die Khomasstreek waar die kiesafdeling met die minste inwoners se inwonerstal op 22 000 staan, het een raadslid glo ’n verslag ingedien waar net 71 inwoners geraadpleeg is. Dit verteenwoordig ’n skamele 0,3% van die gemeenskap. Gemeenskapslede in verskeie streke soos Zambezi, Erongo en Khomas het gekla dat goewerneurs en raadslede van kiesafdelings voorstelle vir verskeie veranderinge sonder hul insette gemaak het. Na bewering het die flou voorstelle van streke tot die vertraging van die openbaarmaking van die verslag gelei. – republikein@republikein.com.na

Kommissie mis sperdatum

Kommentaar

Republikein 2025-06-17

Meld asseblief aan om kommentaar te lewer

Kommissie mis sperdatum

Kommentaar

Republikein 2025-06-17

Meld asseblief aan om kommentaar te lewer

MELD AAN

Advertensie