Katjavivi soek sy huisie by die see

Die regering het na bewering ’n versoek deur voormalige Speaker van die Nasionale Vergadering, professor Peter Katjavivi, om ’n gesogte staatseiendom op Swakopmund onder die vervreemdingskema te koop, vertraag.

Die vervreemdingsbeleid, wat deur die ministerie van werke en vervoer geadministreer word, gee huurders die eerste reg om staatseiendomme teen minder as markwaarde te koop.

Die beleid bepaal egter dat slegs bewoonde eiendomme kwalifiseer, terwyl ’n huis wat aan ’n kantoor of instelling toegeken is, soos die Speaker se amptelike woning, buite die bestek van die skema val.

Katjavivi het hierdie week aan Network Media Hub (NMH) gesê dat hy aansoek gedoen het vir die eiendom onder die vervreemdingskema omdat dit destyds erg vervalle en onbewoonbaar was.

“Ek het nog nooit enige eiendom van die regering onder die vervreemdingsbeleid ontvang nie. Daarom is ek deur die relevante owerhede aangeraai om aansoek te doen vir hierdie eiendom,” het hy gesê.

Katjavivi, wat in Maart 2025 as Speaker uitgetree het ná ’n dekade in die amp, het gesê die toestand van die eiendom het sy belangstelling gemotiveer.

“Vensters en deure was gebreek en die gras het selfs binne die gebou gegroei. Die rioolstelsel agter die huis was ook in gevaar,” het hy gesê.

Dokumente wat deur NMH gesien is, onthul dat Katjavivi in die eiendom begin belang stel het terwyl hy nog as Speaker gedien het en nadat hy die amp verlaat het.

Katjavivi het gesê hy het sy eerste aansoek vir die eiendom op 18 Maart 2025 by die voormalige minister van werke en vervoer, John Mutorwa, ingedien en toe op 4 April 2025 ’n hernude aansoek by die huidige minister, Veikko Nekundi, ingedien voordat hy op 7 April 2025 by eerste minister Elijah Ngurare geappelleer het.

Hy het aan NMH gesê hy het ook voormalige president Nangolo Mbumba in kennis gestel.

AFTREEHUIS

In ’n brief aan Ngurare het Katjavivi gesê hy soek ’n aftreehuis.

“Noudat ek afgetree, versoek ek dat ek hierdie geleentheid gegun word om ’n aftreehuis aan die kus te besit," het hy geskryf.

Katjavivi het hierdie week aan NMH gesê dat hy verwag dat die ministerie ’n gepaste prys in pas met die regeringswaardasie sou bepaal.

“Ek het formeel aansoek by die ministerie van werke aansoek gedoen en versoek dat hulle my inlig oor watter prys hulle dit aan my sou verkoop. Ek het nooit die prys aangedui nie, want ek het verwag dat die ministerie die regeringsprys sou aandui waarteen die eiendom gepas gewaardeer sou word vir verkoop aan my.” 

Katjavivi het gesê dat slegs Nekundi op sy aansoeke gereageer het, wat aandui dat die regering se eiendomsvervreemdingskema hersien word.

“Die reaksie van die ministerie was dat die vervreemdingstelsel hersien word, so hulle kon nie destyds op my versoek reageer nie. Hulle het nie direk geweier nie,” het hy verduidelik.

‘TRAE REAKSIE’

Katjavivi meen die ministerie se lang stilswye was dalk nie heeltemal prosedureel nie.

“Alle aanduidings van die trae en vae reaksie het duidelik getoon dat iemand anders dalk die eiendom wou vat,” het hy beweer.

Die voormalige Speaker het verder beweer dat hy etlike maande nadat sy aansoek ingedien is, verby die eiendom gery het en opgemerk het dat daaraan gewerk is.

"Ek het verby die gebied gery en gesien dat die eiendom effens opgeknap is van wat dit was toe ek dit versoek het.”

Hy het gesê hy het geen onlangse opdatering van die ministerie ontvang nie.

“Ek wag steeds vir die uitslag van hul hersiening van die vervreemdingskema, sowel as ’n amptelike antwoord oor die spesifieke eiendom, maar tot op hede was daar geen opdatering nie.”

Vrae wat Woensdag aan Nekundi gestuur is, het onbeantwoord gebly, maar Ngurare het Woensdag aan NMH gesê dat Katjavivi se versoek nie sy kantoor bereik het nie.

“Ek het vandag van Uganda teruggekeer. Ek sal met die betrokke departemente opvolg en terugvoer gee,” het hy geantwoord.

“Maar gebaseer op die gebeure wat u beskryf, klink dit asof die staatsgebou dalk vir hom opgeknap kan word en as die voormalige Speaker kwalifiseer, sal hy toegelaat word om dit te koop,” het Ngurare verduidelik.

Katjavivi self was voorheen in ’n identiese situasie betrokke by dieselfde eiendom, toe sy voorganger, wyle Theo-Ben Gurirab, in 2015 aan president Hage Geingob geskryf het om persoonlike ingryping te versoek om die eiendom te bekom.

Die regering het dit destyds van die hand gewys, met die voormalige minister in die presidensie, Frans Kapofi, wat gesê het dat die huis nie beskikbaar was vir vervreemding nie, omdat dit aan die staat as ’n instelling behoort het, nie aan enige individu nie.

“Die enigste huise wat vervreem kan word, is dié wat individue beset,” is Kapofi destyds aangehaal.

Katjavivi, destyds pas as nuwe Speaker aangestel, het daardie standpunt sonder aarseling in die openbaar ondersteun en gesê: “Die huis behoort aan die Nasionale Vergadering.”

Gurirab is in 2022 oorlede.

– [email protected]