Kapofi: ‘Nie 'n enkele sent’

Die minister van verdediging en veteranesake, Frans Kapofi, sê die drie gepantserde voertuie wat met Uganda verbind word, is in Namibië vir demonstrasiedoeleindes. Volgens Kapofi is dit omdat die regering die moontlikheid ondersoek om soortgelyke militêre toerusting plaaslik te vervaardig.Die leier van Affirmative Repositioning (AR), Job Amupanda, het verlede week aan die media gesê drie militêre gevegsvoertuie is teen N$18 miljoen elk van Uganda verkry. Die verkryging was volgens Amupanda deur middel van ’n maatskappy wat na bewering met die Namibiese musikant Gazza verbind word.Die voertuie bestaan uit twee gepantserde Toyota Land Cruisers en ’n gepantserde KIA-troepedraer.Kapofi het in reaksie aan Republikein gesê die regering het in teenstelling met Amupanda se bewering, nie die voertuie gekoop nie. “Ek weet van die voertuie, maar dit is nie gekoop nie. Die regering het nie ’n enkele sent aan die aankoop daarvan bestee nie,” het Kapofi gesê.Volgens hom het die voertuie deur Tanzanië en Zambië gereis voordat dit in Namibië aangekom het. Hier word dit vir demonstrasiedoeleindes ten toon gestel word as deel van die regering se belangstelling om soortgelyke voertuie, met die moontlikheid om dit self te vervaardig. Kapofi het gesê die regering doen sake met Windhoeker Maschinenfabrik (WMF) en nie met Gazza nie – wie se betrokkenheid by die reëling deur Amupanda beweer is.“Dit alles het niks met Gazza te doen nie. Ons doen nie sake met hom nie, maar met Windhoeker Maschinenfabrik,” het die minister gesê. Gazza kon nie vir kommentaar bereik word nie.DIE VOERTUIEDie kommersiële faktuur wat vir grensdoeleindes gebruik is – met die nommer CI20260817 – identifiseer Windhoeker Maschinenfabrik, wat in die suidelike nywerheidsgebied van Windhoek geleë is, as beide die kliënt en die geadresseerde. Die duurste voertuig op die lys is ’n gepantserde troepedraer van KIA, beskryf as ’n KLTV RHD Cobra 4, met ’n waarde van US$400 000.Die tweede is ’n Toyota Land Cruiser 300 Petrol Cobra, met ’n waarde van US$275 000, terwyl die derde ’n Toyota Land Cruiser 79 Cougar is, met ’n waarde van US$255 000.Die faktuur dui die gesamentlike waarde van die drie voertuie aan as US$930 000, wat gelykstaande is aan 3,42 miljoen dirham van die Verenigde Arabiese Emirate (VAE).Dit identifiseer ook Streit Security Vehicles FZ LLC in die VAE as die begunstigde van die betaling en verskaf bankbesonderhede by die Commercial Bank of Dubai.Die afleweringsvoorwaardes word aangedui as EXW, Streit, RAK – ’n verwysing na ’n reëling wat Streit se fasiliteit in Ras Al Khaimah in die VAE betrek. Die faktuur dui nie die voertuie se volledige vervoerroete aan nie.Die dokument dra die handelsmerke van NEC-STREIT Uganda Ltd, die National Enterprise Corporation en BUBU, tesame met ’n maatskappystempel gedateer 17 Augustus 2026.UITSTALLINGAugust 26, waaronder Windhoeker Maschinenfabrik val, se waarnemende uitvoerende hoof, David Brown, het aan Republikein gesê die faktuur was slegs vir doeaneklaringsdoeleindes.Brown het gesê die voertuie het Namibië via Katima Mulilo binnegekom met die volle medewete van die ministerie van verdediging. Volgens hom was dit oorspronklik bestem vir die Suid-Afrikaanse Lugvaart- en Verdedigingsuitstalling wat in September in Pretoria plaasgevind het.Brown het gesê die voertuie moes in Namibië met kommunikasietoerusting toegerus word, voordat dit na die uitstalling geneem sou word. Dit het egter weens vertragings met die grensklaring en die beweging van die konvooi, te laat in die land aangekom. Brown het die bewering verwerp dat die voertuie se teenwoordigheid in Namibië ongewoon is. Volgens hom was die voertuie wel gepantser, maar het geen wapens gedra nie.“Dit is bloot gepantserde voertuie. Hulle is groen. Hulle verskil niks van ’n voertuig wat kontant vervoer nie,” het Brown gesê.“Daar is geen wapentuig op nie; dit is net ’n onderstel met pantser bo-op.” Brown het bevestig die voertuie is onder ’n tydelike invoerpermit van ses maande na Namibië gebring en gaan aan die weermag, polisie, grensbeamptes en ander potensiële gebruikers vertoon word.Volgens hom was die reëling ook daarop gemik om geleenthede te ondersoek om Namibië se vermoë om gepantserde voertuie te vervaardig, deur die betrokkenheid van beleggers te laat herleef.Brown het gesê die langtermyn-doelwit, is om te bepaal of soortgelyke voertuie plaaslik vervaardig kan word vir gebruik in Namibië en vir uitvoer na ander markte.‘HEELTEMAL VERKEERD’Amupanda het beweer die voertuie het Namibië sonder die medewete van die militêre owerhede binnegekom.“Ons weet nie of hulle ’n staatsgreep beplan nie of wat presies aan die gang is dat hulle hierdie gevegsvoertuie by [president Yoweri] Museveni in Uganda gaan haal het nie,” het hy gesê.Amupanda het foto’s gewys van wat hy beweer die drie voertuie is en lede van die publiek aangemoedig om dit te versprei, omdat August 26 dit glo geheim wou gehou het. Brown het die bewerings verwerp en gesê “Amupanda is heeltemal verkeerd”.Volgens hom moes Amupanda eers vir duidelikheid gevra het voor hy die bewerings gemaak het. “Jy behoort dalk net eers by ons te kom navraag doen,” het Brown gesê.Kapofi het op sy beurt Amupanda daarvan beskuldig dat hy vals inligting versprei en hom met militêre aangeleenthede bemoei.“Ek weet nie wat hy beplan of wie agter hom sit nie, maar hy steek sy neus in alles wat hom nie aangaan nie. En wie is hy om hom te bemoei met alles wat met militêre operasies te doen het?” het Kapofi gevra. Volgens die minister versprei Amupanda leuens “en dit raak nou te veel”.Kapofi het Amupanda uitgedaag om enige vermoedelike onreëlmatighede by die Teenkorrupsiekommissie van Namibië(ACC) aan te meld of die howe te nader.“Laat hy maar soontoe gaan,” het Kapofi gesê. – sonja@nmh-hub.com.na

Kapofi: ‘Nie 'n enkele sent’

Kommentaar

Republikein 2026-11-09

Meld asseblief aan om kommentaar te lewer

Kapofi: ‘Nie 'n enkele sent’

Kommentaar

Republikein 2026-11-09

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.