Helfte ontevrede oor diens by binnelandse sake

Byna die helfte van Namibiërs bly ontevrede met dienste wat deur die ministerie van binnelandse sake, immigrasie, veiligheid en sekuriteit gelewer word, volgens bevindings uit vorige opnames oor tevredenheid van burgers.Sommige Namibiërs kla al lankal op sosiale media en spreek in die daaglikse lewe hul frustrasies uit oor hulle heeldag in rye by die ministerie moet staan, herhalende probleme van vanlyn stelsels in die gesig staar en maande lank vir noodsaaklike dokumente wag. By die eerste konferensie oor kliëntesorg en doeltreffende dienslewering in Windhoek verlede week, het die minister, Lucia Iipumbu, gesê die eerste omvattende opname het ’n algehele openbare gradering oor tevredenheid van 54% aangeteken, terwyl die vorige opname ’n gradering van sowat 50% behaal het. “Hierdie bevindinge word nie deur ons behandel as openbare kritiek wat eenkant toe geskuif word nie. Dit is ontvang as ’n pleidooi om te verbeter, te moderniseer en beter diens te lewer,” het sy gesê. HERVORMINGSIipumbu het gesê die regering het sedertdien ’n aantal hervormings ingestel wat daarop gemik is om burgers se ervarings te verbeter wanneer hulle toegang tot openbare dienste verkry. Dit sluit beleggings in moderne diensgeriewe in, asook inisiatiewe vir digitalisering, verbeterings in identiteits- en burgerlike registrasiedienste, versterkte kliëntesorgpraktyke en pogings om omkeertye te verkort. Die ministerie het voorheen maatreëls ingestel om die ervarings van kliënte te verbeter, insluitend verlengde bedryfsure by die hoofkantoor in Windhoek. In November 2025 het die ministerie aangekondig dat toonbankdienste deur die middagetensuur vanaf 1 Desember 2025 oop sal wees om wagtye te verminder en toegang tot dienste te verbeter, maar ten spyte van hierdie inisiatief het die publiek steeds onbevredigende resultate aangeteken. Die hervormings het ook versterkte burgerlike registrasiestelsels ingesluit, met personeel wat in staatshospitale ontplooi is en die bekendstelling van ’n elektroniese stesel vir geboortes in sekere openbare en private hospitale om tydige registrasie van geboortes te verbeter. Nietemin het die minister erken dat aansienlike uitdagings bly bestaan. “Ons het ook toenemend klem gelê op diensdissipline: Dat amptenare nie hul eie prosedures mag uitdink nie, nie onnodige struikelblokke mag skep nie, nie burgers as onderbrekings van hul werk mag behandel nie en nie mag vergeet dat die openbare kantoor ’n plek van diens is, nie ’n plek van voorreg nie,” het sy gesê. Die minister het beklemtoon dat dienslewering verder strek as administratiewe prosesse en kern staan tot die regering, openbare vertroue en nasionale ontwikkeling. “Kliëntesorg het die gesig van die regering geword. Elke lessenaar, ontvangstoonbank, oproepsentrum, grenspos, polisiestasie, staatskantoor en digitale platform is ’n punt waar vertroue óf versterk óf verswak word,” het sy gesê. Iipumbu het verder volgehoue tekortkominge uitgelig wat uitmuntende diens raak, insluitend lang wagtye, swak kommunikasie, gefragmenteerde prosesse, beperkte aanspreeklikheid en vertragings wat vermy kon word. GRENSPOSTEDie ministerie se jongste pogings sluit ’n vennootskap met die Namibië Toerismeraad (NTB) in wat daarop gemik is om standaarde van kliëntediens onder amptenare wat by die land se grensposte gestasioneer is, te verbeter. By die opening van die Welcome Host-program vir grensbeamptes verlede week het Iipumbu gesê immigrasiebeamptes, polisielede en doeanebamptes is dikwels die eerste kontakpunt vir besoekers wat Namibië binnekom. “In baie opsigte is julle die gesig van die Namibiese regering. Julle is die eerste handdruk. Julle is die eerste glimlag. Julle is die eerste bron van inligting,” het sy gesê. Die opleidingsprogram, gefasiliteer deur ’n memorandum van verstandhouding wat in Mei tussen die ministerie en die NTB onderteken is, poog om amptenare by die Hosea Kutako Internasionale Lughawe (HKIA) en Eros-lughawe in Windhoek toe te rus met kliëntediensvaardighede om besoekers se ervarings te verbeter en Namibië se beeld as toerismebestemming te versterk. “Wanneer diens swak is, gaan die skade verder as een gefrustreerde kliënt. Dit raak vertroue in instellings, vertroue in leierskap, vertroue in die ekonomie en vertroue in die land. “Omgekeerd, wanneer diens uitstekend is, skep dit trots. Dit sê vir burgers dat hulle saak maak. Dit sê vir besoekers dat Namibië georganiseerd en verwelkomend is. Dit sê vir beleggers dat Namibië ernstig is,” het Iipumbu bygevoeg.– desmarius@nma.com.na

Helfte ontevrede oor diens by binnelandse sake

Kommentaar

Republikein 2026-08-24

Meld asseblief aan om kommentaar te lewer

Helfte ontevrede oor diens by binnelandse sake

Kommentaar

Republikein 2026-08-24

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.