Geingob open nuwe Katutura-noodeenheid

Elizabeth //Kheibes – President Hage Geingob het die nuwe en verbeterde noodeenheid ter waarde van N$12,6 miljoen by die Katutura-staatshospitaal saam met Standard Bank en die Motorongelukkefonds (MVAF) amptelik geopen. Projek 9682 het byna twee jaar gelede afgeskop met ’n nuwe resussitasiekamer met agt beddens wat die voorsiening van suurstof en krag by elke bed insluit. Dit het ook die omskakeling van die ou kamer in ’n pediatriese eenheid ingesluit, asook die uitbreiding van die ginekologiese ondersoekkamer, die omskakeling van stoorruimte in konsultasiekamers, sowel as die installering van ’n nuwe lugverkoelingstelsel.Volgens die voorsitter van die MVAF, dr. Herman Shitaleni, het die fonds die afgelope vyf jaar ’n afname in die aantal padongelukke en verwante beserings en sterftes aangeteken. Daar was ook ’n afname in padsterftes van 26 uit 100 000 inwoners tot 18. “Ons het gevorder van die verlies van 700 lewens per jaar tot 466 lewens verlede jaar,” het Shitaleni gesê. Hy sê die fonds bestee sowat N$200 miljoen jaarliks aan mediese uitgawes bykomend tot die N$85 miljoen in ander eise. Standard Bank se uitvoerende hoof, Erwin Tjipuka, sê die projek beklemtoon dat gesondheidsorg nie ’n voorreg is nie, maar eerder ’n basiese mensereg.“Kwaliteit-gesondheidsorg is nie ’n voorreg nie, dit is ’n fundamentele reg. Vandag is ’n beduidende stap gedoen in die verwesenliking van die reg vir elke lid van ons gemeenskap,” het Tjipuka gesê.“Soos ons hierdie mylpaal vier, laat ons onthou dat ons meer as nommers is. Ons is ’n gemeenskap van unieke individue met ongekende potensiaal.”Hy het namens Standard Bank die versekering gegee dat die bank sal voortgaan om in die land te belê en die weg te baan vir ’n bemagtigde Namibiese nasie. President Hage Geingob het dié sentiment gedeel en bygevoeg die projek is ’n “mikrokosmos van die breër stappe en ingrypings deur die regering om die staatsgesondheidsektor meer toeganklik en meer in pas met die behoeftes van inwoners te maak. “Ons hoor dikwels die frase ‘gesondheid is rykdom’. Vir ’n regering wat oorgehaal is om gedeelde vooruitgang vir almal te verseker, bly die gesondheid en welstand van ons burgers ons grootste bate.Dit is daarom vir my ’n groot voorreg om ’n ware weerspieëling van die Harambee-gees te vier wat weerspieël word deur ’n werkende vennootskap en samewerking tussen ’n ministerie, ’n staatsonderneming en ’n maatskappy in die private sektor,” het Geingob gesê.Volgens die president het die kabinet ’n plan goedgekeur wat die ministerie van gesondheid en maatskaplike dienste voorberei het om Namibië se staatsgesondheidstelsel te verbeter. “Die implementering daarvan het reeds oraloor die land begin tydens die huidige finansiële jaar en teen ’n koste van meer as N$16 miljard,” het hy gesê.Sommige van die projekte wat reeds geïmplementeer word, sluit in die konstruksie van die Windhoek-distrikshospitaal, die vestiging van intensiewesorgeenhede (ICU’s), sowel as eenhede vir dialisesorg by distrikshospitale landswyd. Bykomende projekte sluit in opknappings van bestaande hospitaalgeboue en die installering van suurstofstelsels by verskillende gesondheidsgeriewe in die land. – republikein@republikein.com.na

Geingob open nuwe Katutura-noodeenheid

Kommentaar

Republikein 2025-05-01

Meld asseblief aan om kommentaar te lewer

Geingob open nuwe Katutura-noodeenheid

Kommentaar

Republikein 2025-05-01

Meld asseblief aan om kommentaar te lewer

MELD AAN

Advertensie