Ernstige bewerings oor Uaandja se bestuurstyl

Die Namibiese raad vir die bevordering van beleggings en ontwikkeling (NIPDB) het geweier om sy werwingsprosesse bekend te maak ná bewerings dat sy uitvoerende hoof, Nangula Uaandja, die direksie met ’n ystervuis regeer (a one-woman empire) en haar makkers “links en regs” aanstel.Uaandja is daarvan beskuldig dat sy die raad bestuur asof sy “die alfa en die omega” is omdat sy deur wyle president Hage Geingob aangestel is en slegs verantwoordbaar is aan die kantoor van die president. NIPDB het tans slegs ’n raadgewende raad wat na verwagting teen Junie vanjaar deur ’n ander raad van direkteure vervang sal word.Dit kom te midde van berigte dat 26 werknemers die afgelope drie jaar bedank het, waarvan sommige skaars ’n maand daar gewerk het. Sommige het gesê dit is as gevolg van ’n onaangename werksomgewing onder Uaandja se leierskap.In reaksie op navrae het NIPDB se woordvoerder, Catherine Shipushu, gesê werknemers bedank om verskeie redes.“As ’n werkgewer erken NIPDB dat nie alle werknemers vir ’n onbepaalde tyd by die organisasie sal aanbly nie. “Werknemers kan om verskeie redes kies om te bedank, wat wissel van nuwe loopbaangeleenthede tot persoonlike of gesinsverpligtinge en natuurlik is daar sommige wat dit doen omdat hulle voel daar word nie in hul behoeftes voorsien nie.“Alhoewel NIPDB ’n relatief nuwe entiteit is, is ons daartoe verbind om ’n positiewe werkskultuur te kweek wat ons werknemers bemagtig om te floreer. “Vir hierdie doel het ons ’n reeks strategiese inisiatiewe geïmplementeer wat ontwerp is om hierdie kultuur in ons organisasie se DNS in te sluit,” het Shipushu gesê.AANSTELLINGSDaar bestaan ook bewerings dat Thinus Fourie in die direksie aangestel is net twee dae nadat sy pa – Dawie Fourie wat glo ’n voormalige mentor van Uaandja was by PricewaterhouseCooper (PwC) – haar na bewering gekontak het.Bronne binne NIPDB het gesê Fourie is aangestel as die bestuurder vir navorsing en ontwikkeling vir nuwe ondernemings en sektore sonder dat hy aan ’n deursigtige werwingsproses onderhewig was. Die pos is glo ook nie in die openbaar geadverteer nie.Uaandja is ook daarvan beskuldig dat sy Jessica Hauuanga, haar voormalige persoonlike assistent by PwC, in die pos van senior bestuurder vir die behoud van beleggingservaring en nasorg aangestel en haar binne sewe maande tot die uitvoerende direkteur van dié departement bevorder het. Volgens bronne is Hauuanga bevorder sonder om haar proeftydperk te voltooi of om aan kwalifikasievereistes vir dié pos te voldoen.Net so word gesê dat Ndeyapo Shilongo, voorheen die hoof van Quest Consulting – ’n maatskappy wat NIPDB vir bestuurskonsultasiedienste gekontrakteer het – en Ndapewa Hangula, nog ’n PwC-kollega van Uaandja, tot senior bestuursposte bevorder is.Verder het bronne binne NIPDB aangedui dat Uaandja verlede jaar tydens ’n personeelvergadering dit duidelik gemaak het dat daar altyd ’n plek in die NIPDB sal wees vir Dino Ballotti wat in Augustus 2024 uit NIPDB bedank het nadat hy vir die parlement genomineer is. Ballotti het sedertdien na NIPDB teruggekeer.Dit is nie die eerste keer dat NIPDB sulke beskuldigings in die gesig staar nie. In 2021 het die kabinetsekretaris, George Simataa, bewerings ondersoek dat Uaandja “ongekwalifiseerde trawante” in sleutelposisies geplaas het. Voormalige werknemers van die Namibië Beleggingsentrum (NIC), wat nou in NIPDB saamgesmelt is, het die raad daarvan beskuldig dat hulle staatsamptenare oor die hoof gesien het ten gunste van aansoekers uit die private sektor tydens werwingsprosesse.Shipushu meen inligting uit hul aanstellingsprosedures kan nie openbaar gemaak word nie aangesien dit inbreuk sal maak op die regte van hul personeel.“Die werwingsproses is van nature sensitief aangesien dit vertroulike werknemersinligting behels, wat ons verplig is om te beskerm. Soos met alle ander aspekte van ons bedrywighede is die werwingsproses eties en geanker in die beleidsraamwerk,” het sy gesê.Die direksie is ook daarvan beskuldig dat hy Uaandja se PhD-studies en Hauuanga se MBA gefinansier het terwyl hulle ander personeellede toegang geweier het tot opleidingsgeleenthede, wat glo direk met hul rolle verband hou. Dit het gelei tot persepsies van begunstiging en ongelyke behandeling binne die organisasie.– jemima@nmh-hub.com.na

Ernstige bewerings oor Uaandja se bestuurstyl

Kommentaar

Republikein 2025-11-12

Meld asseblief aan om kommentaar te lewer

Ernstige bewerings oor Uaandja se bestuurstyl

Kommentaar

Republikein 2025-11-12

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.