‘Beleggers het niks om te vrees’

Die seepgladde verandering in leierskap ná die afsterwe van president Hage Geingob sal die internasionale en plaaslike beleggersgemeenskap verseker dat Namibië ’n wetsgehoorsame land en steeds ’n aantreklike beleggingsbestemming is.Sondag se vinnige aanstelling van president Nangolo Mbuma en visepresident Netumbo Nandi-Ndaitwah in oorleg met die Grondwet sal beleggers se vertroue in Namibië se toewyding aan die oppergesag van die reg versterk, sê Salomo Hei, die besturende direkteur van High Economic Intelligence (HEI).Die onafhanklike ekonoom, dr. Omu Kakujaha-Matundu, is oortuig dat Geingob se dood nie beleggersentiment sal knou nie.“Die sakegemeenskap kan gerus wees dat Namibië ’n land is wat deur die wet bestuur word en ek voorsien geen verandering in enige wetgewing wat die sakegemeenskap sal benadeel nie. So plaaslike en internasionale beleggers wat beleggings in Namibië beplan, het niks om voor bang te wees nie,” sê Kakujaha-Matundu.‘OP YS’Die uitvoerende direkteur van die Instituut vir Openbare Beleidsnavorsing (IPPR), Graham Hopwood, meen Mbumba sal nie sake met nuwe beleidsrigtings en skielike veranderinge deurmekaar krap nie.Namibië se nuwe staatshoof sal eerder die wyle president se termyn voltooi deur op Geingob se prioriteite soos sy ambisie vir groenwaterstof en die Harambee-welvaartplan te fokus.“Met die naderende verkiesing sal die parlement min tyd hê om belangrike nuwe stukke wetgewing ná die goedkeuring van die begroting te hanteer,” sê Hopwood.Hy verwag omstrede wetsontwerpe soos die nuwe beleggingswet en die Nuwe Raamwerk vir Gelyke Ekonomiese Bemagtiging (Neeef) sal eers “op ys geplaas word”. “Baie beleggers hou die [komende] verkiesing dop en wonder oor watter tipe leierskap en beleidsrigtings in 2025 kop gaan uitsteek eerder as om hulle oor die Mbumba-presidensie te bekommer,” sê Hopwood.OPBLOEINamibië ondervind ’n opbloei in direkte buitelandse belegging (FDI), hoofsaaklik vanweë mynbou, eksplorasie en groen waterstof.Cirrus Capital se databasis toon bykans N$24,6 miljard het in die eerste nege maande verlede jaar in die vorm van bruto vastekapitaalformasie (GFCF) of beleggings in Namibië ingevloei.In dieselfde tydperk in 2022 was dié bedrag sowat N$18 miljard. Teen die einde van die derde kwartaal in 2021 het GFCF ongeveer N$16 miljard beloop. Belegging in Namibië het vanaf 2015 tot 2021 getuimel. – republikein@republikein.com.na

‘Beleggers het niks om te vrees’

Kommentaar

Republikein 2025-04-30

Meld asseblief aan om kommentaar te lewer

‘Beleggers het niks om te vrees’

Kommentaar

Republikein 2025-04-30

Meld asseblief aan om kommentaar te lewer

MELD AAN

Advertensie