Verskroeide aarde

Die Erongo-streekraad het Donderdag ’n noodvergadering met die komitee vir ramprisikobestuur op Swakopmund gehou oor veldbrande wat ’n kommerwekkende stadium bereik het nadat dit sedert Junie in die streek woed. 

Die voorsitter van die streekraad, Lazarus Kanelombe, het gesê brande in die streek “het oor die afgelope paar maande voortgeduur en het nou ’n kommerwekkende stadium bereik, wat ’n ernstige bedreiging vir gemeenskappe, vee, weidingsgebiede, infrastruktuur en die omgewing inhou”. 

Die hoofstreekbeampte, Mupenzeni Ntelamo, het by die noodvergadering gesê duisende hektaar het oraloor die streek afgebrand, met ’n syfer van tot 100 000 hektaar wat aangedui is en dat geen rekenskap vir die verliese gegee is nie. 

Hy het gesê een brand is deur weerlig veroorsaak en die res deur mense. Ntelamo het brandende sigaretstompies, vuurmaakhout en as wat weggegooi word, heuningoesers en mense wat slange uit gate uitrook, onder die oorsake gelys. 

Ntelamo het gesê ’n kind by Omatjete is geïdentifiseer as iemand wat een brand begin het en is in die sorg van die ouers. Hy het gesê sommige brande is vermoedelik deur veediewe en stropers gestig om bewyse te vernietig. 

Hy het gesê die Namibiese polisie, die direktoraat van bosbou in die ministerie van die omgewing, bosbou en toerisme (MEFT) het geensins opgetree nie en geen polisieverteenwoordiger is na die vergadering gestuur nie. 

Kanelombe het gevra: “Waarom, ten spyte van hektaar op hektaar vernietigde landbougrond, is niemand tot op hede in hegtenis geneem en aangekla nie?” 

Hy het gesê die brande in die kiesafdelings van Dâures, Karibib en Omaruru “is ’n streekkwessie” en “verg ’n streekreaksie”. 

Die adjunkdirekteur van administrasie, Vigilant Hangula, het ’n aksieplan voorgelê wat vyftien maatreëls uiteensit, onder meer ’n streekbrandrisikokaart, gemeenskapsbrandspanne en ’n vroeëwaarskuwingstelsel, vooraf-geposisioneerde toerusting en ’n nabrand-ondersoek ná elke groot brand. 

Die direktoraat van bosbou word as leidende sektor by byna elke maatreël genoem. 

Kanelombe het gesê die plan is oorweeg, maar nog nie behoorlik begryp nie en dat dit insette van MEFT vereis voordat dit aanvaar kan word.

Die ministerie het nie die vergadering bygewoon nie. ’n Lid het gesê die afwesigheid is teleurstellend. 

Die adjunkdirekteur van finansies, Daphne Cloete, het gesê die streekrampfonds het die finansiële jaar op 1 April met N$319 000 geopen. Sy het gesê N$99 000 is reeds vir brandbestrydingstoerusting, komberse, kos en iets te drinke in die gebiede van Karibib en Dâures aangewend, wat N$264 000 oorlaat. 

Sy het gesê instellings wat verplig is om N$5 000 per jaar tot die fonds by te dra, het nie betaal nie. Tydens die vergadering is besluit om aan hulle te skryf. 

Die Omaruru-boerevereniging het gesê boere is tevrede met die ministerie van verdediging en veteranesake se reaksie, dat sy personeel betyds was en het die polisie en vrywilligers in die gemeenskap bedank. Volgens die boerevereniging is die struikelblokke ’n gebrek aan toerusting en opleiding. 

’n Kaart dui aan dat tussen nege en twaalf brande in een nag opgespoor is. Daar word bevraagteken of daardie getal net aan weerlig toegeskryf kan word. 

Die verdedigingsministerie se woordvoerder, kolonel Petrus Shilumbu, het aan Republikein gesê sy personeel is op 6 Junie by Omatjete ontplooi, op 12 Julie by Okombahe en Omatjete, en op 27 Julie by Okotjandjoura. 

Hy het gesê die weermag het geen brandbestrydingstoerusting nie, hulpverlening is nie die weermag se hoofopdrag nie en dat boere die militêre basis by Karibib en die ministerie se hoofkantoor vir bystand bel. 

Kanelombe het gesê as die vergadering se besluite nie uitgevoer word nie, sal die ramp teen September nie meer hanteerbaar wees nie.

Intussen het brandspanne in die omgewing van Kalkfeld vir dae aaneen veldbrande op verskillende plase probeer blus. Vanaf die plaas Radio is berig dat daar geen ongevalle was nie en genoeg weiding vir diere oorgebly het. 

 – [email protected]