Maak reg vir ’n droogtejaar, sê Schlettwein

Ellanie Smit - Die herhaling van die droogteverskynsel beklemtoon die behoefte aan die dringende implementering van maatreëls vir droogtegereedheid.Dit sluit uitgebreide pogings in om reën- en vloedwater op te gaar vir beter aanpassing en veerkragtigheid in die toekoms. Dit volgens die minister van water, landbou en grondhervorming, Calle Schlettwein, se opmerkings by die ministerie se werkwinkel vir strategie en jaarbeplanning wat vandeesweek in Swakopmund gehou is. “Hierdie is ’n droogtejaar met oesmislukkings en ’n lae oes wat in al die oesstreke ervaar word.”Hy het gesê die ministerie se droogtehulpmaatreëls en verspreidingsnetwerke moet gemobiliseer en ontplooi word om die verwoestende impak van droogte op produsente te versag.Schlettwein sê dringende optrede is nodig om in menslike en veebehoeftes te voorsien. DOELWITTE Hy het bygevoeg die verbetering van die sekerheid van watervoorsiening vir huishoudings en nywerhede, die verligting van reeds bestaande wateronsekerheid en sanitasie-uitdagings en die uitoefening van doeltreffende rentmeesterskap oor grondwaterhulpbronne is belangrike doelwitte in die watersektor – nou en oor die lang termyn.Volgens hom is die bou van die modulêre ontsoutingsaanleg aan die kus, waarvoor verkryging en private-openbare-vennootskappe (PPP’s) gedurende die jaar gefinaliseer moet word, dus ’n belangrike punt op die agenda.Nog ’n prioriteit is die versnelde implementering van die Namibiese Watersektor Ondersteuningsprogram en verwante projekte onder die vaandel van die kabinetskomitee vir die sekuriteit van watervoorsiening – wat sal fokus op die konstruksie en uitbreiding van die watersuiweringsaanlegte en waterverspreidingsinfrastruktuur ook landswyd. Daarbenewens moet strategieë ontwikkel word vir doeltreffende gesamentlike bestuur van gedeelde oorgrenswaterbronne deur bilaterale samewerking en gesamentlike kommissies om te verseker dat Namibië se deel van die hulpbron veilig is. Schlettwein het gesê dit is ook van belang om met die uitvoerbaarheidstudie vir die Noordoewer/Vioolsdriftdam langs die laer Oranjerivier te begin om ekonomiese geleenthede in die Suide verder te ontsluit en te diversifiseer, veral vir die aktiwiteite wat uitsluitlik afhanklik is van die laer Oranjerivier vir besproeiing en watervoorsiening vir nywerheids- en huishoudelike gebruik.Hy het gesê ander prioriteite vir die ministerie is die hantering van die oorblywende wateronsekerheid in landelike en buitestedelike gebiede deur die geteikende rehabilitasie van boorgate, die boor van nuwe boorgate, ontwikkeling van putvelde en modernisering van tradisionele putte en konstruksie van kort waterpyplyne.Volgens hom is ander fokusareas ook die ondersteuning van navorsingswerk en die versterking van moniteringsaktiwiteite vir hulpbronkwantifisering en beplanning, die takeling van uitdagings in die sanitasiesektor en die betrokke ministerie se benutting van belanghebbendes se ondersteuning om die inisiatiewe wat in die onlangs goedgekeurde nasionale strategie vir sanitasie en higiëne geskep is, te implementeer. – republikein@republikein.com.na

Maak reg vir ’n droogtejaar, sê Schlettwein

Kommentaar

Republikein 2026-02-03

Meld asseblief aan om kommentaar te lewer

Maak reg vir ’n droogtejaar, sê Schlettwein

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.