Verkiesingskalender bekend gestel

Die Verkiesingskommissie van Namibië (ECN) het sy amptelike verkiesingskalender en landswye kiesersveldtog gister amptelik van stapel gestuur, ’n belangrike stap in die land se voorbereiding vir die komende plaaslike owerheid- en streekraadverkiesings later vanjaar. Die voorsitter van die ECN, Elsie Nghikembua, het die bekendstelling beskryf as ’n herbevestiging van die ECN se verbintenis tot deursigtigheid, inklusiwiteit en demokratiese integriteit.“Vandag is ’n beduidende mylpaal in ons demokratiese reis. Ons maak nie net datums bekend nie, ons lei die nasie na ’n betekenisvolle verkiesingsdeelname,” het sy gesê.Die verkiesingskalender beeld die volledige verkiesingsproses in drie fases uit, naamlik voorverkiesing, verkiesing en naverkiesing.Volgens Nghikembua is lesse wat geleer is uit die 2024 presidensiële en Nasionale Vergadering-verkiesings ook deel van die kalender.’n Omvattende oorsig is na die laaste verkiesing voorberei, terwyl ’n verslag ook aan die Speaker voorgelê is in ooreenstemming met die kieswet.“Die verslag het alle bevindinge en voorstelle van geakkrediteerde waarnemers van die 2024-verkiesing in ag geneem.“Dit sal mettertyd openbaar gemaak word om verantwoordbaarheid en voortgesette verbetering te bevorder,” het sy gesê.In aanloop tot vanjaar se verkiesings in November, sal ’n Aanvullende Registrasie van Kiesers (SRV) vanaf 1 tot 14 Augustus plaasvind. Die proses is gemik op burgers wat 18 geword het ná die 2024 algemene registrasie van kiesers, sowel as diegene wat nuwe kieserskaart moet kry of wie s’n vervang moet word, asook veranderinge aan geregistreerde adresse. Die SRV is beperk tot Namibië omdat die verkiesings gebaseer is op kiesafdelings. Sleutel-sluitingsdatums sluit in die proklamasie van tydperke vir nominasies en kiesbeamptes in September, asook die publikasie van kandidatelyste en stemlokale in November. Die stemdag is geskeduleer vir 25 November, met die nasionale uitslae wat op 30 November verwag word. “Die titel van ons veldtog ‘Raak betrokke’ is ’n direkte oproep tot aktiewe deelname en doen ’n beroep op inwoners om betrokke te raak by die registrasie- en stemproses as ’n fundamentele demokratiese verantwoordelikheid,” het kommissaris Gerson Tjihenuna beklemtoon. Die veldtog sal tot November duur en gebruik maak van digitale media, gemeenskapsforums en skooldebatte om aktiewe deelname aan te moedig. – republikein@republikein.com.na

Verkiesingskalender bekend gestel

Kommentaar

Republikein 2025-08-18

Meld asseblief aan om kommentaar te lewer

Verkiesingskalender bekend gestel

Kommentaar

Republikein 2025-08-18

Meld asseblief aan om kommentaar te lewer

MELD AAN

Advertensie