Stop fopnuus, sê ECN

Die verspreiding van waninligting oor die Verkiesingskommissie van Namibië (ECN) skep glo wantroue en skend sy beeld. Daarom het die ECN onlangs ’n beroep op politieke partye gedoen om te help deur teen fopnuus te waak. Die ECN se voorsitter, Elsie Nghikembua, het dié opmerking Vrydag tydens die ondertekening van ’n gedragskode deur politieke partye gemaak.Dít kom weke nadat die ECN gekritiseer is vir die manier waarop die kommissie die tenderproses vir die druk van die komende verkiesing se stembriewe hanteer het.Gerugte doen ook die rondte dat die ECN saam met Swapo werk om die verkiesing te manipuleer – ’n bewering wat nog nooit bewys is nie.Die tender vir die druk van die stembriewe is aan ’n Suid-Afrikaanse maatskappy, Ren-Form CC, toegeken.Politieke partye en politieke kommentators het die ECN se besluit om die oop tenderproses slegs dae voor die sperdatum te kanselleer, erg gekritiseer.Sommige politieke partye het minder kritiek teen die ECN begin lewer en die meerderheid van hulle was deel van die proses om te verseker dat die verkiesings vry en regverdig sal wees.Vandaar Nghikembua se beroep op politieke partye om saam te werk om fopnuus en waninligting te stop.“In ’n demokrasie is dit noodsaaklik dat ons ’n omgewing bevorder waar vrye en regverdige verkiesings kan plaasvind sonder intimidasie, teistering of verkeerde inligting,” het sy gesê en bygevoeg dat die ECN onlangs opsetlike dade van waninligting en vals bewerings waargeneem het. Die kommissie glo dit is gemaak om hulle beeld te skend en wantroue te skep.“Dit is nie net nadelig vir ons verkiesingsdemokrasie nie, maar ook vir ons pragtige land. Ons moet almal hier hande vat om die verspreiding van vals nuus en waninligting te keer.“Ons moet onthou dat ons dade op ons as individue en as verteenwoordigers van onderskeie politieke partye, reflekteer. “Die kiesers kyk nie net na ons vir leierskap nie, maar ook vir voorbeelde van hoe politieke dialoog konstruktief en inklusief kan wees.“Dit is ons plig om deur voorbeeld te lei en ’n politieke kultuur te kweek wat dialoog bo verdeeldheid en konsensus oor konflik waardeer.”LEIDINGNghikembua het ook gesê die gedragskode sal na verwagting die politieke partye lei oor hoe hulle mekaar ondanks hul verskille met respek kan behandel.“Die gedragskode wat ons vandag onderteken, bied ’n raamwerk wat ons interaksies sal rig deur te verseker dat ons ons politieke verbintenisse met waardigheid en respek vir mekaar uitvoer,” het sy gesê.Nghikembua het ook daarop gewys dat die gedragskode in noue samewerking met alle geregistreerde politieke partye, organisasies en verenigings opgestel en goedgekeur is. Afskrifte daarvan is op 30 September aan die gemagtigde verteenwoordigers van elke politieke party verskaf.“Ek is vas oortuig dat hierdie gedragskode die grondslag vir gesonde politieke mededinging sal lê. Dit moedig deursigtigheid aan, bevorder aanspreeklikheid en sit ons gedeelde verantwoordelikhede as belanghebbendes in die verkiesingsproses uiteen. “Ek doen ’n beroep op elkeen van julle om hierdie beginsels nie net tydens die verkiesingstydperk te aanvaar nie, maar as deel van julle daaglikse politieke verbintenisse.”#NamibiaDecides2024

Stop fopnuus, sê ECN

Kommentaar

Republikein 2025-06-17

Meld asseblief aan om kommentaar te lewer

Stop fopnuus, sê ECN

Kommentaar

Republikein 2025-06-17

Meld asseblief aan om kommentaar te lewer

MELD AAN

Advertensie