PDM ontken geldprobleme

Die Popular Democratic Movement (PDM) het bewerings ontken dat hy met ernstige finansiële probleme worstel.Dit kom ná gerugte dat die party oorweeg om salarisbetalings aan ’n groot deel van sy arbeidsmag te staak, asook om waar nodig afleggings te doen.Bronne binne die party het aan Network Media Hub (NMH) gesê daar is glo tydens verlede week se vergadering van die nasionale uitvoerende komitee (NUK) besluit dat streekskoördineerders, vleuelleiers en administratiewe personeel moet voorberei vir salarisverlagings.Die beweerde afleggings sal glo 16 streekskoördineerders raak wat elk N$7 000 per maand verdien, asook vleuelleiers wat N$9 000 per maand ontvang. Die party oorweeg dit na bewering ook om voertuie van sy vloot te verkoop, wat deur huurkoopooreenkomste aangekoop is, om koste te verminder.PDM skuld na bewering tans sowat N$250 000 aan partylid Nico Smit en staar bykomende skuld in die gesig, insluitend betalings aan drukkerye vir verkiesingsmateriaal. Maandelikse uitgawes het glo tot N$360 000 gestyg, wat die party se finansiële probleme verder vererger.Benewens personeelafleggings, beplan PDM glo om sy begrafnisbystandsprogram en ander uitgawes af te skaal. Ten spyte van hierdie maatreëls het die party aangekondig dat sy visepresident vanaf April 2025 by die betaalstaat gevoeg sal word.BEWERINGS ONTKENDie PDM se sekretaris-generaal, Manuel Ngaringombe, het Dinsdag hierdie bewerings ontken toe hy met vrae daaroor genader is."As dit nie van my kantoor af gekom het nie, steek daar geen waarheid daarin nie," het Ngaringombe gesê.Die party se woordvoerder, Geoffrey Mwilima, het die bewerings heftig ontken en gesê die party het geen planne om enigiemand af te lê nie. "Waar het jy hierdie inligting gekry? Die mense wat jou leuens voer, moet briewe of kennisgewings verskaf wat deur die party aan hulle gegee is. "Dit gaan nie gebeur nie, niemand sal afgelê word nie. Die party dink nie eens daaraan nie," het hy gister gesê.Hierdie beweerde finansiële druk volg op 'n uitdagende tydperk vir PDM wat die party se treurige prestasie tydens die onlangse nasionale verkiesing insluit. Die party het slegs vyf setels in die Nasionale Vergadering verseker, vergeleke met die 16 setels wat hy in 2019 behaal het toe dit die amptelike opposisieparty was.Die beweerde afleggings en pogings om koste te bespaar beklemtoon die party se stryd om bedrywighede te handhaaf te midde van toenemende skuld.– republikein@republikein.com.na

PDM ontken geldprobleme

Kommentaar

Republikein 2026-02-03

Meld asseblief aan om kommentaar te lewer

PDM ontken geldprobleme

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.