Modi-besoek: Ministerie weerlê IPC se bewerings

Die ministerie van internasionale betrekkinge en samewerking het die Independent Patriots for Change (IPC) se “valse bewerings” rakende die beweerde uitsluiting van die amptelike opposisieparty tydens die Indiese eerste minister, Narendra Modi, se onlangse staatsbesoek weerlê.Dit volg op ’n sterk bewoorde verklaring wat Woensdag uitgereik is waarin die IPC dié skuif beskryf het as ’n “sistematiese systap” van sy leier en die byna 300 000 Namibiërs wat in die laaste algemene verkiesing vir die party gestem het. Die verklaring het uitgelig wat die IPC ’n “oomblik van diepgaande ironie” genoem het.“Terwyl Indië se eerste minister op Namibiese bodem staan en die wêreld se grootste demokrasie verteenwoordig, sluit ons eie regering die leier van die amptelike opposisie uit van deelname aan nasionale gebeure,” lui die verklaring.Met verwysing na verskeie onlangse geleenthede, insluitend die presidensiële inhuldiging, die Volksmoordherdenkingsdag en die onlangse Indiese staatsbesoek, het die IPC beweer hierdie uitsluitings was nie toevallig nie, maar eerder “doelbewuste keuses” gewortel in die regerende party se weiering om meningsverskille te erken.“Dit is die gedrag van ’n party wat tydelike mag met permanente eienaarskap van die staat verwar,” lui die verklaring.In reaksie hierop het die ministerie se uitvoerende direkteur, Penda Naanda, Donderdag in ’n skriftelike verklaring verduidelik die leier van die opposisieparty is as ’n standaardprosedure na die middagete genooi wat ter ere van Modi aangebied is, maar nie na die amptelike gesprekke nie.“Die burgemeester van Stad Windhoek, raadslid Ndeshihafela Larandja, wat op die IPC-kaartjie dien, is ook genooi en het die middagete bygewoon.“Die uitnodigings aan beide die leier van die amptelike opposisieparty en dié van die burgemeester van Stad Windhoek is deur IPC-partylede onderteken en afgehaal.“Enige insinuasie dat ’n uitnodiging aan die burgemeester uitgereik sou word terwyl dieselfde nie aan die leier van die amptelike opposisieparty toegestaan word nie, maak nie sin nie, maar grens ook aan belaglik,” het hy gesê.“Dit moet duidelik gestel word dat amptelike gesprekke tussen twee lande gevoer word en nie met opposisiepartye nie.“Die ministerie wil dit graag op rekord plaas dat die opposisieparty navraag gedoen het oor waarom sy leier [Panduleni Itula] nie genooi is om die 11:00-program by te woon nie, terwyl agterbankers wel genooi is.”“Die reaksie was dat sy leier na die middagete genooi is, aangesien die 11:00-program die amptelike gesprekke was wat slegs deur kabinetsministers bygewoon is, en bewerings dat agterbankers genooi is, is onwaar,” het Naanda gesê.“Tydens die amptelike gesprekke het Namibiese kabinetslede en hul besoekende eweknieë oor bilaterale kwessies beraadslaag, insluitend die ondertekening van Memorandums van Verstandhouding en ooreenkomste, en dit is aan die leier van die amptelike opposisie in die parlement verduidelik.”“Die ministerie wil benadruk dat hy onder geen omstandighede die geloofwaardigheid van die leiers van die opposisiepartye ondermyn nie,” het Naanda gesê.– nikanor@nmh-hub.com.na

Modi-besoek: Ministerie weerlê IPC se bewerings

Kommentaar

Republikein 2025-09-01

Meld asseblief aan om kommentaar te lewer

Modi-besoek: Ministerie weerlê IPC se bewerings

Kommentaar

Republikein 2025-09-01

Meld asseblief aan om kommentaar te lewer

MELD AAN

Advertensie