Laaste eer betoon aan Hage

“Ek is vandag ’n baie trotse Namibiër. Trots omdat die seun wat onder ’n boom by ’n veepos in Grootfontein gebore is, vandag erken en deur die hele wêreld geliefd is en hy verdien dit,” het Monica Geingos, die voormalige eerste dame tydens die gedenkdiens van wyle president Hage Geingob by die Onafhanklikheidstadion in Windhoek gesê. Hy is op 4 Februarie 2024 omstreeks 00:04 in die Lady Pohamba Private Hospitaal aan kanker dood. ’n Begrafnisstoet het Vrydag 46 kilometer vanaf Staatshuis deur Windhoek, Khomasdal en Katutura gery vir mense om hul laaste eer aan Geingob te betoon. Duisende mense het langs die roete gestaan en gesing en met die verbyry het talle mense in trane uitgebars en mekaar getroos. In Klein Windhoek het mense blomme in die straat gegooi. Dié blomme is later opgetel en onder ’n foto van die president geplaas. Die stoet het by Casa Rosalia – sy private woning net buite Windhoek – vir ’n paar uur verwyl vir die familie om afskeid te neem. Daarna is sy oorskot na die parlementstuine geneem waar hy die nag in staatsie gelê het. Mense kon hom by die oop kis vir die laaste keer groet. Menige mense het na die tuine gestroom om afskeid van hom te neem ten spyte van die reën. Saterdag is Geingob se oorskot na die Onafhanklikheidstadion geneem waar nie net duisende gewone Namibiërs die verrigtinge bygewoon het nie, maar ook presidente, koninklikes en diplomate van oraloor die wêreld. Sewentien presidente en vier voormalige presidente was ook teenwoordig.Geingos, die weduwee van wyle president Geingob, het in haar toespraak gesê dat Hage geliefd was en dat hy lief gehad het. “Hy was geliefd en die aantal boodskappe van medelye van oraloor die wêreld is ’n bewys daarvan. Die aantal hooggeplaastes, insluitend die presidente wat teenwoordig is, spreek boekdele van sy vermoë om ’n indruk te maak. Hy het maklik kontak met mense gemaak en mense van alle vlakke van die samelewing het met hom vereenselwig.”“Hage, die internasionalis, die pan-Afrikaner, die Namibiër, die gesinsman, die trotse vader vir baie, die vreugdevolle gewer, die man wat van die Namibiese huis gepraat het. ’n Huis waar ons almal in dieselfde rigting beweeg. Terwyl ons oor Hage gerou het, het ons alles geword wat hy wou hê ons moet wees; verenig, wetsgehoorsaam en mense wat in dieselfde rigting beweeg.”“Hy was daartoe verbind om ’n inklusiewe, verenigde Namibië te bou wat aan sy potensiaal voldoen. Hy wou ’n land hê waar kulture geïntegreer word en daar nie stamgebondenheid is nie, soos die omgewing waarin hy grootgeword het.”“Die dokters het ons op 16 Januarie 2024 ingelig dat hy kanker het. Die volgende dag het ons ons eerste onkologie-afspraak gehad en op die 18de het hy ’n mediaverklaring uitgereik. Het hy geweet hoeveel tyd hy nog oorhet? Nee, hy het nie en sy afsterwe was heeltemal onverwags. Hy was gretig om af te tree; ons het so baie planne gehad.“Sy heengaan is ’n herinnering om gereed te wees. Sy dood het ons bymekaargebring, maak nie saak wat ons verskille vooraf was nie. Ons liefde, ons gedeelde liefde vir hierdie land, het ons deur sy dood bymekaargebring,” het Geingos gesê. “Hage het my in die voorste ry van die beproewing van kanker geplaas. Al die dokters met wie ek gewerk het, is bekommerd oor die toename in kankergevalle in Namibië en oor die wêreld. Hulle het ook gesê hulle is bly oor die mans wat vir ’n siftingsproses kom ná die president se aankondiging dat hy kanker het.”Die Wêreldgesondheidsorganisasie (WHO) voorspel ’n toename van 77% in kankergevalle teen 2050. Kankersorg, veral die ontoereikendheid wat dit definieer, moet ’n prioriteitsfokus wees, want dit sal beslis vir my wees,” het sy afgesluit. Die kis is Sondagoggend vanaf die stadion na die Helderakker net buite Windhoek geneem vir die begrafnis.Hier het duisende Namibiërs bymekaargekom om hul laaste eer aan wyle Geingob te betoon.Terwyl die kis in die grond gesak het, is 21 kanonskote afgevuur en het sewe straalvliegtuie oorgevlieg. Die skare het sy gunstelingliedere gesing. – tanja@republikein.com.naGRYS BLOKKONINKLIKESVerenigde Koninkryk – Prinses Anne PRESIDENTEAngola – João Manuel Gonçalves LourençoBotswana – Mokgweetsi MasisiBurundi – Generaal Évariste NdayishimiyeDemokratiese Republiek die Kongo – Félix-Antoine Tshisekedi TshilomboEthiopië – Sahle-Work ZewdeFinland – Sauli NiinistöDuitsland – Frank-Walter SteinmeierGhana – Nana Addo Akufo-AddoKenia – William Samoei RutoKatar – Shaik Thani Malawi – Lazarus McCarthy ChakweraMosambiek – Filipe Jacinto Nyusi Sierra Leone – Julius Maada BioSuid-Afrika – Cyril RamaphosaTanzanië – Samia Suluhu HassanZambië – Hakainde Hichilema Zimbabwe – Emmerson Mnangagwa VOORMALIGE PRESIDENTELiberië – Ellen Johnson Sirleaf Nigerië – Olusegun ObasanjoSuid-Afrika – Tabo MbekiTanzanië – Jakaya Mrisho Kikwete ANDERKuba – Estaban Lazo Hernádez; president van die staatsraad in die nasionale vergaderingEswatini – Thulisile Dladla; eerste ministerSão Tomé and Principe – Patrice Emery Trovoada; eerste minister en hoof van die regeringAfrikaanse Unie-kommissie – Moussa Faki Mahamat; voorsitter

Laaste eer betoon aan Hage

Kommentaar

Republikein 2025-11-06

Meld asseblief aan om kommentaar te lewer

Laaste eer betoon aan Hage

Kommentaar

Republikein 2025-11-06

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.