Kiesers se biometriese data in buitelandse hande

Kommer oor sekuriteit het onlangs opgeduik oor die Verkiesingskommissie van Namibië (ECN) se biometriese data vir algemene kieserregistrasie wat reeds die afgelope 12 jaar in die buiteland gehuisves word.Die hoofkiesbeampte van die ECN, Peter Shaama, het egter verseker dat hoewel die databasis in die buiteland gehuisves word, die data veilig is.“Die databasis vir kieserregistrasie is nie toeganklik vir enige ongemagtigde ECN-personeel nie, ook nie vir personeel van buite nie. “Die databasis bevat vertroulike inligting wat met kiesers verband hou en daarom verseker die kommissie dat datasekuriteit en kontrole oor privaatheid geïmplementeer word om die integriteit van die databasis te verseker,” het Shaama benadruk.Die ECN het bevestig dat ’n tender vir die hantering van die data gedurende die 2011-’12-finansiële jaar toegeken is aan die oorspronklike verskaffer, Face Technology, wat nou handel dryf as Toppan Gravity. Toppan Gravity se hoofkantoor is in Hongkong met ’n kantoor in Suid-Afrika.Die tender het ingesluit die verskaffing, aflewering, installering, ingebruikneming, bedryf en instandhouding van sagteware en ondersteunende infrastruktuur vir die mobiele kieserregistrasiestelsel (MVRS).STELSELShaama het gesê die stelsel is spesifiek ontwerp en ontwikkel vir die bestuur van die ECN-kieserregister en die “argitektoniese toepassing” daarvan bly lewenslank bruikbaar en kan nie net op enige mark gevind word nie.Hy het bygevoeg dat bykomende toepassings geïnkorporeer is, insluitend kieserverifikasie, die nominasie van kandidate, die registrasie van politieke partye en organisasies en die bestuur van resultate, waarvan die meeste voorheen met die hand bedryf is.“Dié projek is beplan om oor ’n tydperk van drie boekjare uitgevoer te word, [met] ’n totale belegging van N$185 681 634 om die versterking van ons verkiesingsdemokrasie te verseker,” het hy gesê.Shaama het gesê die ECN het gekies om nie ’n nuwe diensverskaffer te bekom nie.“Om die wiel weer uit te vind deur ’n nuwe verskaffer te bekom, sou nie net daartoe gelei het dat die pasgemaakte biometriese kieserregistrasiestelsel heeltemal weggegooi word nie, maar dit kon ook gelei het tot ’n situasie waar die kommissie gedwing sou gewees het om van toerusting, sagteware-installasie of dienste voorsien te word.“Dit sou nie voldoen aan vereistes van uitruilbaarheid met die bestaande pasgemaakte stelsel nie,” het Shaama verduidelik.Volgens Shaama is die stelsel uitsluitlik vir die ECN ontwerp en ontwikkel om dit in staat te stel om die prosesse van kieserregistrasies te bestuur en ’n geloofwaardige kieserregister te handhaaf.Shaama het ook daarop gewys dat dit die ECN in staat gestel het om van ’n stelsel van papiergebaseerde kieserregistrasie (manual system) na ’n pasgemaakte biometriese kieserregistrasiestelsel te verander.PLAASLIKE KAPASITEITGedurende Shaama se voorganger, Theo Mujoro, se tydperk as hoofkiesbeampte, het die ECN se IT-afdeling voorgestel dat interne, of ten minste plaaslike, kapasiteit geskep word om die databasis na Namibië terug te stuur. Hulle het glo voorgestel dat daar in opleiding en kapasiteitsbou vir die ECN-span belê word om dit in staat te stel om die stelsel intern te ontwikkel en in stand te hou. Die departement het ook voorgestel om oopbronsagteware te gebruik om lisensiekoste te verminder en om groter aanpassings moontlik te maak om aan die spesifieke behoeftes van die ECN te voldoen. Hulle het samewerking met plaaslike tegnologiemaatskappye en universiteite aangeraai om hul kundigheid en hulpbronne te benut.– republikein@republikein.com.na

Kiesers se biometriese data in buitelandse hande

Kommentaar

Republikein 2025-11-07

Meld asseblief aan om kommentaar te lewer

Kiesers se biometriese data in buitelandse hande

Kommentaar

Republikein 2025-11-07

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.