'Gekwalifiseerde politici noodsaaklik'

Die redakteur van Namibia Fact Check Frederico Links sê dit is hoog tyd dat 'n akademiese voorvereiste vasgestel word vir aspirantpolitici om hul amp te beklee.

Links het ook 'n beroep op politieke partye gedoen om aspirantleiers aan te moedig om te belê in die bevordering van hul opleiding.

Hy het die opmerkings verlede week tydens 'n onderhoud met Netwerk Media Hub (NMH) gemaak, waartydens hy verduidelik het dat die wêreld verder ontwikkel het as leiers wat bloot kan lees en skryf. Volgens hom moet ampsdraers komplekse ontwikkelingskwessies kan begryp.

“Ek dink wel daar moet 'n soort minimum akademiese kwalifikasie of tipe vlak wees wat 'n politikus moet hê. Omdat bestuur 'n komplekse saak is - of dit nou op plaaslike, streeks- of nasionale vlak is. Ek bedoel, daar moet regtig 'n minimum kwalifikasievlak wees wanneer dit hierby kom,” het Links gesê.

Onder die onderwerpe waaroor politici moet besluit, is begrotings- en ontwikkelingskwessies op plaaslike, streeks- en nasionale vlak.

“Jy kan nie in vandag se tyd mense in besluitnemings- en beleidmakersposisies lplaas waar die besluite meer kompleks en ingewikkeld raak nie. Die manier van dinge doen word al hoe meer kompleks en ingewikkeld,” het Links verduidelik.

“Jy het dus regtig mense nodig wat 'n vlak van opvoeding, 'n vlak van ervaring en 'n vlak van blootstelling het wat hulle 'n bestuursbate sal maak. Ek dink wel daar moet 'n minimum vlak wees, of dit nou 'n nagraadse kwalifikasie of iets is.”

STERK SPAN

Links het die opmerkings gemaak kort nadat Netumbo Nandi-Ndaitwah, ondervoorsitter van Swapo, tydens die party se sentrale komiteevergadering lede aangemoedig het om te fokus op die kies van bekwame leiers voor vanjaar se plaaslike en streeksverkiesing.

“Dit is baie belangrik en krities dat ons behoorlik en aggressief moet voorberei vir vanjaar se verkiesings. Hierdie verkiesing maak vir ons baie saak, omdat dit sal bepaal wie aan die voorpunt van dienslewering in ons gemeenskappe sal wees,” het Nandi-Ndaitwah gesê.

“Die leiers wat ons vir verkiesings op streeks- en plaaslike vlak gaan inspan, is diegene wat ons beleid en programme ter plaatse sal implementeer en om te verseker dat die beloftes wat in die Swapo-verkiesingsmanifes gemaak word, ten volle verwesenlik word,” het sy gesê.

“Daarom moet ons daarop fokus om bekwame, toegewyde en visioenêre leiers te kies wat die behoeftes van die mense verstaan en wat onvermoeid sal werk om hul lewens te verbeter.” - [email protected]