ACC kap terug teen LPM se ‘beledigings’

Nuusredaksie - Die direkteur-generaal van die Teenkorrupsiekommissie van Namibië (ACC), Paulus Noa, het teruggekap na die Landless People’s Movement (LPM), wat die agentskap ’n “Swapo-skoothond” genoem het ná die inhegtenisname van die opposisieparty se twee lede en ’n amptenaar van Karasburg se dorpsraad vandeesweek. Maria Veldskoen, Karasburg se burgemeester, die waarnemende uitvoerende hoof van die dorpsraad, Hansina Isaaks, en die voorsitter van die bestuurskomitee, Franciskus Skeyer, is aangekla vir beweerde onwettige aanstellings en die onreëlmatige verandering van ondertekenaars van die raad se bankrekeninge.Die drietal het Dinsdag voor landdros Samingo Kasaone verskyn en is borgtog geweier.Die LPM het die ACC Maandag in ’n skerp bewoorde verklaring daarvan beskuldig dat hy ’n tandelose skoothond van Swapo is en deur Erastus Uutoni, die minister van stedelike en landelike ontwikkeling, as ’n instrument in politieke gevegte gebruik word.“Wanneer daar deurlopend duidelike korrupte aktiwiteite is wat deur lede van Swapo, wat raadslede is, gepleeg word, word daar nie eens ’n skriftelike waarskuwing aan hulle uitgereik nie. Wanneer daar egter ’n administratiewe kwessie in Karasburg is, probeer Uutoni nie sy vooroordeel en diskriminerende ingesteldheid wegsteek nie,” het Lifalaza Simataa, die LPM-woordvoerder, gesê.Noa het Woensdag gesê hy en sy span sal nie afgeskrik word om op die spoor te bly van diegene wat hulle skuldig maak aan korrupsie nie.“Tweedens, die ACC is niemand se skoothond nie. Dit is ’n belediging vir die integriteit van die ACC. Die kommissie is ’n liggaam wat sy mandaat volgens die wet sonder die invloed van enige persoon uitvoer,” het hy gesê.“Die gearresteerde raadslede het die Teenkorrupsiewet oortree en dit is die rede waarom hulle in hegtenis geneem is. Dit blyk dat sommige raadslede dink hulle ís die wet en kan enige besluit neem wat hulle wil, ongeag of so ’n besluit teen die wet op plaaslike owerhede is of nie.”‘PIESANGREPUBLIEK’Die ACC het gesê hy sal nie toelaat dat Namibië in ’n “piesangrepubliek” ontaard weens korrupte amptenare nie.“Namibië is ’n demokratiese staat wat gegrond is op die beginsel van die oppergesag van die reg. Wette, prosesse en prosedures moet nagekom word. Jy word nie ’n raadslid en die volgende ding wat jy doen is om diegene af te dank waarmee jy nie saamstem nie, stel mense in jou guns aan, en vervang diegene met ondertekeningsbevoegdhede vir die plaaslike owerheid se bankrekening nie,” het Noa gesê.Hy het bygevoeg: “Met betrekking tot onregmatige optrede deur raadslede, moet die minister [Uutoni] hulle in toom hou, al beteken dit dat die hele raad geskors word. Sommige raadslede se onwettige optrede is onaanvaarbaar”.“Naamnoemery sal nie die ACC skud nie. Kriminele oortreders sal altyd ondersoek word en indien bewyse gevind word wat oortredings bewys, word hulle voor die hof gebring om die gevolge van die wet in die gesig te staar – soos met die raadslede onder verdenking gebeur het.”– republikeinrepublikein.com.na

ACC kap terug teen LPM se ‘beledigings’

Kommentaar

Republikein 2025-05-06

Meld asseblief aan om kommentaar te lewer

ACC kap terug teen LPM se ‘beledigings’

Kommentaar

Republikein 2025-05-06

Meld asseblief aan om kommentaar te lewer

MELD AAN

Advertensie