‘Wie’s jou pappa?’

Verskeie parlementslede in die Nasionale Vergadering (NV) doen ’n beroep op die kriminalisering van vaderskapsbedrog.

Hulle voer aan dat mans wat onwetend kinders grootmaak wat nie biologies aan hulle verwant is nie, geweldige sielkundige en finansiële trauma ly, met verwoestende gevolge vir beide die mans en die kinders wat betrokke is.

Tydens Dinsdag se debat in die NV het sommige parlementslede (LP’s) gepleit vir die instelling van ’n wet wat ongetroude paartjies sal dwing om DNS-toetse te ondergaan om vaderskap te bevestig.

’n Parlementslid van die Affirmative Repositioning (AR), Tuhafeni Kalola, het gesê sommige vroue gaan voort om die regstelsel uit te buit tot nadeel van mans en kinders.

“Hierdie vaderskapsbedrog moet ernstig opgeneem word. Dit moet regtig gekriminaliseer word, want jy vind uit dat mans kinders gegee word wat nie aan hulle behoort nie en vroue doen dit vir ekonomiese oorlewing.

“Maar hierdie ding raak nie net mans nie, dit raak die kinders ook. Stel jou net voor, op my ouderdom, wanneer my ma vir my sê: ‘Nee, nee, nee, hierdie pa vir wie jy geld stuur, is nie meer jou pa nie,’” het hy gesê.

“Ons het seks vir plesier en vir voortplanting. Dus moet hulle nie net vir iemand ’n kind gee wat nie aan hulle behoort nie.

“Hierdie mense [mans] moet ernstig opgeneem word en die praktyk moet gekriminaliseer word. Die vroue moet in hegtenis geneem word, want verbeel jou om skielik te hoor dat die kind nie joune is nie.

“Dis regtig sielkundig. Daardie vaderskapsbedrog moet ernstig opgeneem word en ons moet beskerm word as die seunskind van hierdie land,” het Kalola aangevoer.



VERPLIGTE DNS-TOETSE

Die voormalige minister van die omgewing, bosbou en toerisme, Pohamba Shifeta, het Kalola se sentimente beaam en voorgestel dat die parlement verpligte DNS-toetsing vir ongetroude paartjies wettig maak.

“Daar is mans wat selfdood gepleeg het omdat hulle kinders gegee is en daarna is die kinders ná sewe jaar van hulle weggeneem.

“Die enigste oplossing is die DNS-toets, sodat die man van die begin af weet: ‘Dis my kind of dis nie my kind nie.’

“Daar is selfs gevalle aan die gang waar twee of meer mans na daardie kind omsien en hulle word op die geboortesertifikaat geregistreer. En almal van hulle . . . almal het betaal. Of hulle nou daar was of nie, die kind behoort net aan een.

“Waarskynlik behoort die kind nie eens aan een van hulle drie nie. Daar kan nog ’n pa wees wat nie onder hulle [drie] is nie,” het hy gesê.

Shifeta het bygevoeg: “Laat ons ook die belange van die kind in ag neem. Stel jou voor ’n kind word vir vyf of selfs tien jaar grootgemaak om die pa lief te hê. Weet jy watter soort trauma dit veroorsaak? Dit kan vir ewig by die kind bly.

“Nou skielik word vir die kind gesê: ‘Moenie jou pa liefhê nie, jy het eintlik nog een.’ Kan jy jou die trauma voorstel? Dis ’n ernstige saak.”

Die leier van die Popular Democratic Movement (PDM), McHenry Venaani, het sy stem tot die debat gevoeg en gesê dat slegs die ma werklik die identiteit van ’n kind se biologiese pa ken.

“Jy het die kinders grootgemaak, maar die dag toe sy [van een man na ’n ander] aanbeweeg het, nadat ek hierdie kinders grootgemaak en vir hul lewens geveg het, is die dag waarop sy vir my sê nou wil sy ’n ander [man] hê, want hy is ’n dokter of die minister van verdediging.

“Hy is mooier aangetrek as ek en nou sê jy ‘terloops, hierdie kinders is nie eens joune nie’. Weet jy van die mishandeling wat jy ons aandoen?” het hy gevra.

– [email protected]