Tweehonderd raak oor vier jaar vermis

Ná ses jaar is daar nog geen spoor van die plaaswerkers Bernard Neibeb, Rodney Willemse, Gerson Willemse en Siefried Uirab nadat hulle op 11 September 2017 as vermis aangemeld is nie. Die vier mans was uit op borgtog van N$500 elk in verband met ’n klag van veediefstal teen hulle. Volgens familielede was hulle besig om met die betrokke plaaseienaar te onderhandel om die klag te laat vaar en hulle te laat terugkeer werk toe. Die vier het glo die vorige Woensdag (8 September 2017) in ’n polisievoertuig met die registrasienommer N307T geklim om hierdie onderhandelinge voort te sit, en is daarna nooit weer gesien nie.Hierdie raaiselagtige verdwyning het die Landless People’s Movement (LPM)-parlementslid Utaara Mootu aangespoor om op 28 September 2023 vir die minister van binnelandse sake, immigrasie, veiligheid en sekuriteit, Albert Kawana te vra of daar enige verwikkelinge in dié saak is. In sy amptelike antwoord sê die minister die verdwyning is deeglik ondersoek, hoewel dié ondersoek vrugteloos was. Dit is bevestig dat die N307T-nommerplaat aan ’n Toyota Hilux toegeken is wat aan die eenheid vir misdaadondersoeke op Grootfontein behoort. Twee getuies het glo die vier vermistes agterop ’n bruin Land Cruiser in die Rietfontein-gebied gesien. Die vermistes se selfone kon nie opgespoor word nie, beweerde doodsdreigemente kon nie bewys word nie en die klagte van veediefstal is teruggetrek omdat die verdagtes nooit weer in die hof verskyn het nie. Koerantplasings oor die vermistes het ook niks opgelewer nie.Die verdwyningsvoorval is egter nie ’n geïsoleerde een nie.Statistieke wat Kawana verskaf het, toon dat 201 mense sedert 2019 en tot September vanjaar verdwyn het. Die meerderheid, spesifiek 104, het in die Khomasstreek vermis geraak. Uit die Erongostreek word 26 mense vermis, terwyl 17 mense in die Oshanastreek verdwyn het, 12 van Hardap en 11 van die Oshikotostreek. Geen persoon is gedurende hierdie tydperk in die Kavango-Westreek as vermis aangemeld nie, volgens die polisiesyfers wat die minister gedeel het.Kawana sê 2021 was die jaar waartydens die meeste mense in Namibië verdwyn het – 69 mense deur die loop van die jaar. Vanjaar is 57 mense tussen Januarie en September as vermis aangemeld. Van hulle is 20 gevind, hoewel vyf reeds dood was. Sowat 22% van die vermistes was minderjarig. Die polisie kon sover vanjaar sowat 35% van diegene opspoor wat as vermis aangemeld is.Nampol hou ’n register van vermiste persone by en versprei inligting oor hulle deur die plaaslike mediaplatforms sodat burgers moontlik van hulp kan wees in die opsporing van dié persone. Volgens Kawana is die grootste uitdaging die feit dat lede van die publiek nie die polisie op hoogte hou of mense wat vermis aangemeld is, gevind is of nie. “Dit trek die akkuraatheid van die statistieke in twyfel.”augetto@republikein.com.na

Tweehonderd raak oor vier jaar vermis

Kommentaar

Republikein 2026-02-03

Meld asseblief aan om kommentaar te lewer

Tweehonderd raak oor vier jaar vermis

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.