Polisie vra vir kalmte in Okahandja-sake

Terwyl openbare kommer toeneem en bespiegelinge rondom die wrede verkragtings- en moordsake van drie jong meisies op Okahandja versprei, het die polisiekommissaris in die Otjozondjupastreek, Philip Hidengwa, gesê verdagtes word steeds ondervra en leidrade opgevolg.Die tragiese moorde op Ingrid Maasdorp (5), Roswinds Fabianu (6) en Beyoncé Kharuxas (15) het die nasie geskok en 'n vlaag van kommer veroorsaak. Met 11 mense wat in verband met die drie afsonderlike sake ondervra is, het talle antwoorde gesoek en die media het gereageer met 'n vloed van opdaterings, wat dikwels teenstrydig van aard was.Kommissaris Hidengwa het beide die publiek en media aangespoor om die verspreiding van ongeverifieerde inligting te vermy. Hy het sy frustrasie oor die situasie te kenne gegee en kommer uitgespreek oor hoe inligting hanteer en berig word. “Toe dit vermeld is, is daar gesê dat dieselfde drie mense by een spesifieke saak betrokke was,” het hy verduidelik. “Maar as jy dit begin opdeel in drie hier, twee daar, skep dit verwarring. Mense begin vergelykings tref en aannames maak.”Hidengwa het beklemtoon dat hoewel deursigtigheid belangrik bly, die huidige vloei van inligting meer kwaad as goed doen. “Die meeste van die inligting wat ons aan die media gee, skep eintlik meer probleme binne die samelewing en onder inwoners,” het hy gesê. “Jy vertel een persoon iets, hulle verdraai die inligting en dan begin mense vergelykings tref.”Die kommissaris het die gevaar van waninligting uitgelig en bygevoeg dat verdagtes steeds ondervra word en leidrade opevolg word. “Jy het dalk nie altyd die regte verdagte beet nie,” het hy gewaarsku.Voortaan het Hidengwa dit duidelik gemaak dat opdaterings slegs deur amptelike interne platforms gekanaliseer sal word. “Ons sal slegs opdaterings aan die kommissarisse en die leierskapspan verskaf. Hy het beklemtoon enige inligting wat benodig word, moet deur die Namibiese polisie se hoofwoordvoerder, adj.komm. Kauna Shikwambi, verkry word.Hy het ook 'n beroep op die publiek gedoen om geduldig te wees. “Ek dink net nie dis regverdig nie. Hierdie mense het families wat geliefdes verloor het. Elke keer as hulle teenstrydige berigte in die nuus sien, voel hulle dat niks gedoen word nie,” het Hidengwa gesê. “Dit ondermyn die publiek se vertroue in die polisie.”Hidengwa het afgesluit met 'n beroep vir korrekte verslaggewing en 'n hernude fokus op die integriteit van die ondersoeke. “Ons moet behoorlik ondersoek instel. Ek weet nie waar mense van hierdie inligting vandaan kry nie. Ons het nie genoeg gekwalifiseerde ondersoekers nie en dit is skadelik vir ons land se beeld. Dit skets 'n prentjie dat die Namibiese polisie nie ernstige ondersoeke kan hanteer nie. En dit is eenvoudig nie waar nie.”Intussen het Shikwambi verlede Donderdag bevestig dat nóg 'n saak van poging van ontvoering in die ondersoek word nadat ’n skoolmeisie van die Laerskool Moses Garoeb in Windhoek glo byna deur twee mans ontvoer is toe sy op pad skool toe was. – republikein@republikein.com.na

Polisie vra vir kalmte in Okahandja-sake

Kommentaar

Republikein 2025-12-19

Meld asseblief aan om kommentaar te lewer

Polisie vra vir kalmte in Okahandja-sake

Kommentaar

Republikein 2025-12-19

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.