Polisie rand glo leerlinge aan

Die Namibiese polisie (Nampol) het ’n ondersoek van stapel gestuur na bewerings dat polisielede glo verskeie leerlinge by die Sarusungu Gekombineerde Skool op Rundu aangerand het.Die beweerde aanrandings het glo gevolg op ’n voorval waarin ’n onderwyser se selfoon verlede week na bewering gesteel en later in ’n toilet gevind is.Verskeie leerlinge is glo tydens die beweerde voorval beseer en sommige moes na bewering in die hospitaal opgeneem word. Dit het tot protesoptrede deur ouers en skoolleiers gelei. Hulle eis aanspreeklikheid en vergoeding vir die geraakte leerlinge, asook die verwydering van die skoolhoof.Nampol se koördineerder vir misdaadondersoeke in Kavango-Oos, adj.komm. Bonifatius Kanyetu, het bevestig die polisie is bewus van die aantygings wat teen sommige beamptes gemaak word. Volgens Kanyetu is die polisie se gedragsdirektoraat opdrag gegee om die aantygings te ondersoek.“Ons is bewus van die verslag. In hierdie stadium is nog geen saak geregistreer nie. Ons gedragsdirektoraat is opdrag gegee om die saak te ondersoek en vas te stel wat presies gebeur het,” het hy gesê.Volgens Kanyetu is beamptes gestuur om vas te stel wat by die skool gebeur het en dat die bevindinge enige verdere stappe sal bepaal.Hy sê die polisie is bewus daarvan dat die voorval voortspruit uit die diefstal van ’n selfoon wat aangemeld is. Geen strafregtelike klagte is oor die beweerde diefstal of die aanrandings aanhangig gemaak nie. Volgens Kanyetu word die polisie gereeld na skole ontbied om met veiligheidskwessies, soos die deursoeking na verbode items, te help.Ouers, gemeenskapslede en verteenwoordigers van die Nasionale Afrika-studentevereniging (Nasa) het Maandag buite die skool byeengekom om protes aan te teken en antwoorde oor die beweerde aanrandings te eis.Volgens Nasa se waarnemende president, Rose Kameya, het die organisasie ’n formele klag ontvang waarin beweer word dat sowat 200 leerlinge glo aangerand is. Kameya sê Nasa eis aanspreeklikheid en vergoeding vir die geraakte leerlinge. Nasa eis ook dat die graad 11-eksamen uitgestel word om te verseker dat beseerde leerlinge nie benadeel word nie.Die ouers se verteenwoordiger, Anton Kawaya, sê hulle is ontevrede met hoe die saak ná ’n vergadering Vrydag met die skoolbestuur hanteer is. Die ouers eis ingrypings deur onderwysowerhede en senior polisiebeamptes.“Ons eis om die direkteur van onderwys en die polisie se leierskap van die streek te sien,” het hy gesê.Volgens Kawaya het die ouers vertroue in die skool se leierskap verloor en versoek dat die skoolhoof verwyder word voordat klasse hervat word.“Ons wil nie die skoolhoof by hierdie skool hê nie. Dit is nie die eerste voorval waar die polisie na bewering ontbied is om leerlinge aan te rand nie. As die skoolhoof verwyder word, sal klasse hervat word,” het Kawaya gesê.Hy beweer sommige leerlinge het ernstige beserings tydens die voorval opgedoen. Ouers het volgens Kawaya X-strale en foto’s as bewys van die beweerde aanrandings voorgelê.“Sommige ouers het met X-strale en foto’s opgedaag wat wys sommige leerlinge het ontwrigte ledemate. Hierdie beserings is deur die polisie veroorsaak,” het Kawaya beweer.Hy het egter erken dat dit steeds onduidelik is wie verantwoordelik was vir die vermiste selfoon wat aanleiding tot die voorval gegee het.“Op die oomblik weet ons nie wie die skuldige of verdagte is nie. Of dit een van ons leerlinge of iemand anders was, ons wag nog steeds vir die uitslag,” het Kawaya gesê.Hy sê die ouers probeer nie om enigiemand te beskerm wat vir die beweerde diefstal verantwoordelik was nie. Hulle wil net hê die ondersoek moet vasstel wie die selfoon gevat het en of oormatige geweld teen die leerlinge gebruik is.Een van die geraakte leerlinge in graad 10 sê die beweerde aanrandings het Donderdag tydens die laaste skoolperiode plaasgevind. “Ons het gesien hoe ses polisiebeamptes ons klaskamer binnekom. Hulle het ons bymekaargemaak en ons op die vloer laat rondrol en paddaspronge laat doen,” het hy beweer.Volgens hom het sy knie in die proses uit sy potjie gespring en hy sê die voorval het hom getraumatiseer. – eliot@nmh-hub.com.na

Polisie rand glo leerlinge aan

Kommentaar

Republikein 2026-07-15

Meld asseblief aan om kommentaar te lewer

Polisie rand glo leerlinge aan

Kommentaar

Republikein 2026-07-15

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.