Okahandja-moorde: DNS word ontleed

Verskeie DNS-weefselmonsters wat verband hou met die moord en verkragting van drie meisies op Okahandja is geneem. Sommige is reeds verwerk, met verdere toetse wat onderweg is om sodoende die beweerde reeksmoordenaar te identifiseer. Só het die hoof van die Namibiese polisie (Nampol), inspekteur-generaal Joseph Shikongo, gesê.Gister was presies twee maande ná die grumoord op die vyfjarige Ingrid Maasdorp en niemand is nog in verband met haar moord in hegtenis geneem nie.Ondanks groeiende openbare frustrasie, hou Shikongo vol vordering word wel gemaak.Shikongo se opmerkings kom te midde van groeiende kommer oor die polisie se kapasiteit om reeksmoorde te ondersoek, nadat sewe voorvalle wat groot opspraak gewek het, se spoor sedert 2005 net doodgeloop het. Die publiek vrees die tragiese moorde op Maasdorp, die sesjarige Roslin Fabian en die 15-jarige Beyoncé !Kharuxas gaan dieselfde paadjie stap. ’n Gesamentlike beloning van N$120 000 word tans aangebied vir inligting wat kan help met die ondersoeke na die moorde op die drie meisies. In ’n onderhoud met Network Media Hub (NMH) het Shikongo die polisie se pogings verdedig. Volgens hom het Nampol van die begin af alle beskikbare hulpbronne ontplooi, insluitend fisieke ontplooiings om openbare vertroue te herstel, asook ondersoek- en ondersteuningspanne. “Ons spanne is sedert dag een op die grond. Ek verstaan nie waarom gevra word of die polisie genoeg doen om die publiek gerus te stel nie. “Hoekom moet ons mense verseker dat ons spanne van die begin af aktief daaraan werk?” het hy gevra.“Ons het selfs die mees senior beamptes ontplooi. Die hoof van die direktoraat vir misdaadondersoeke (CID), kommissaris Moritz !Naruseb, was op die grond saam met die spanne, saam met die polisie se hoof van forensiese ondersoeke, kommissaris Nelius Becker,” het Shikongo gesê.“Ek wil beklemtoon dat, vir die polisie om ’n deurbraak in enige saak te maak, ons die samewerking van enige getuies of enige persoon met betroubare inligting nodig het. “Dis waarom daar ’n beloning aangebied word vir enigiemand wat met bruikbare inligting na vore kom.”B1 BUTCHER-ONDERSOEKTot op hede is sowat N$270 000 in belonings aangebied vir inligting oor sake wat tot 2010 terugdateer. Onder die sake is die berugte B1 Butcher-ondersoek wat in 2005 begin het. Die ongeïdentifiseerde reeksmoordenaar het na bewering ten minste vyf vroue tussen 2005 en 2007 vermoor en van hul liggaamsdele langs die nasionale B1-pad gelos. Die media het die moordenaar die “B1 Butcher” gedoop, met verwysing na die hoofpad waarlangs die liggaamsdele gevind is. Daar is ook na die moordenaar as die “Khomas Ripper” verwys. Die slagoffers was jong tot middeljarige Namibiese vroue van kleur, wat vlot in Afrikaans of Damara of albei was.Dit het gelyk of sommige van die vroue se liggaamsdele gevries of verkoel was. In 2007 is ’n Duits-gebore Namibiër in hegtenis geneem op verkragtingsaanklagte en later in verband met die moorde. Hy is egter later weens ’n gebrek aan bewyse vrygelaat. Nog ’n man, wat later selfdood gepleeg het, is ook by die saak betrek, maar kon nooit afdoende met die moorde verbind word nie.MAGDALENA STOFFELSNog ’n hoëprofielsaak wat onopgelos bly, is die 2010-verkragting en moord van die 17-jarige Magdalena Stoffels in Windhoek. Junias Fillipus is dieselfde dag naby die toneel met bloedbevlekte klere in hegtenis geneem. Forensiese ontledings het egter geen verband met Stoffels gevind nie en alle klagte teen Fillipus is in 2011 laat vaar. In 2013 het Fillipus die polisie vir onregmatige arrestasie en kwaadwillige vervolging gedagvaar. Hoewel twee eise in 2016 weens statutêre beperkings van die hand gewys is, is een eis steeds hangend. Die Stoffels-saak word nou as ’n onopgeloste saak (cold case) bestempel, ten spyte van ’n beloning van N$50 000 vir enige bruikbare inligting. AVIHE CHERYL UJAHAIn 2018 is die negejarige Avihe Cheryl Ujaha in Katutura as vermis aangemeld. Drie dae later is haar verminkte liggaam in nabygeleë bosse gevind, met verskeie liggaamsdele, insluitend haar hande, ’n voet, ribbes, ’n bobeen en ook haar nek wat vermis was. Die destydse woordvoerder van die polisie, Pendukeni Haikali, het toe gesê die moordenaar het vermoedelik haar liggaam gekook voordat dit gestort is. ’n Beloning van N$100 000 is steeds onopgeëis.In reaksie op die bogenoemde onopgeloste sake het Shikongo die belangrikheid van die publiek se samewerking beklemtoon.“Die polisie maak staat op mense wat bewyse het. Sonder inligting kan Nampol, ongeag watter saak dit is, nie optree nie,” het hy gesê.“As ons nie mense het wat inligting of leidrade verskaf nie, raak dit vir die polisie baie moeilik. Sommige sake bly onopgelos ten spyte van hulpbronne wat ontplooi word, omdat niemand na vore kom nie.“Neem die voorval van Avihe as voorbeeld. Daar lê N$100 000 in die bank en wag vir enigiemand wat inligting kan verskaf wat tot ’n arrestasie kan lei. “Wil jy vir my sê niemand wil daardie geld hê nie? Die waarheid is dat geen betroubare inligting ontvang is nie,” het Shikongo gesê.Hy het verwys na ’n voorval waar ’n studenteverpleegster naby die Katutura-hospitaal in Windhoek vermoor is.“Daardie saak is opgelos danksy mense wat met bewyse na vore gekom het. Hul samewerking het ons gehelp om die verdagte op Keetmanshoop in die ?Kharasstreek vas te trek,” het Shikongo gesê. “Dit is jammer dat sommige sake onopgelos bly. Maar ek kan jou verseker ons werk dag en nag om die moorde van die drie kinders te ondersoek.” – republikein@republikein.com.na

Okahandja-moorde: DNS word ontleed

Kommentaar

Republikein 2025-07-18

Meld asseblief aan om kommentaar te lewer

Okahandja-moorde: DNS word ontleed

Kommentaar

Republikein 2025-07-18

Meld asseblief aan om kommentaar te lewer

MELD AAN

Advertensie