Nuwe plan vir oorvol selle

In ’n poging om die ernstige oorbevolking in polisieselle oraloor die land aan te pak, word die moontlikheid ondersoek om die toesig van aangehoudenes na die Namibiese korrektiewe diens oor te dra.

Dit is daarop gemik om beamptes en ook aangehoudenes te beskerm en skade aan die polisie se infrastruktuur te voorkom.

Die inspekteur-generaal van die Namibiese polisie, luitenant-generaal Joseph Shikongo, het in ’n onderhoud met Network Media Hub (NMH) erken oorvol selle is ’n “ernstige uitdaging” wat personeel, die bestuur van gevangenes, maaltye en ook toegang tot mediese sorg raak. 

Volgens hom is Namibië een van die min lande suid van die Sahara waar aangehoudenes ná hul eerste hofverskyning onder die polisie se toesig bly.

“In so baie lande, indien nie almal nie, hoort die aanhouding van die beskuldigde nadat hy voor die hof verskyn het, onder korrektiewe dienste en val dit nie onder die polisie nie,” het Shikongo gesê.

Huidige wetgewing vereis dat die polisie as voogde vir aangehoudenes optree. Die polisiehoof sê egter die stelsel is nie volhoubaar nie. 

“Die huidige wet van Namibië bepaal inderdaad dat die polisie voogdyskap van hierdie gevangenes oorneem. In werklikheid is dit nie veronderstel om so te wees nie,” het hy gesê.

Onderhandelinge is reeds met relevante owerhede aan die gang om dié verantwoordelikheid by die polisie weg te neem en dit na korrektiewe dienste oor te dra.

“Ons het reeds met die onderhandelinge begin. Ons het ’n voorlegging aan die betrokke owerhede gedoen om te oorweeg om die verantwoordelikheid van aanhoudingsgeriewe te verwyder en dit na korrektiewe dienste oor te dra,” het Shikongo verduidelik.

Die omvang van die probleem is uiters kommerwekkend. ’n Verslag wat verlede jaar deur die parlementêre staande komitee oor binnelandse sake, sekuriteit, grondwetlike en regsaangeleenthede vrygestel is, het gewys talle polisieselle huisves baie meer aangehoudenes as waarvoor dit ontwerp is.

Rundu se selle met ’n kapasiteit van 100 aangehoudenes, het toe 249 verhoorafwagtendes gehuisves. Katima Mulilo se selle met 60 beddens het 262 aangehoudenes gehad, terwyl Eenhana, Gobabis, Oshikango en Nkurenkuru se selle ook beduidend oor hul kapasiteit was. Landswyd was daar 2 969 verhoorafwagtendes wat buitelandse burgers ingesluit het.

Shikongo sê toegewyde aanhoudingsgeriewe sal dié kommer takel deur die las op polisieselle te verlig en te verseker dat aangehoudenes in geriewe gehuisves word wat vir hul sorg ontwerp is.

“Dit is ’n versagtende uitwerking waaraan ons werk,” het hy gesê. 

Hy het beklemtoon regswysigings en voldoende begrotings is nodig om die oplossing volhoubaar te maak.

Die plan is ’n beduidende stap om Namibië se regstelsel te moderniseer en in lyn te bring met streekpraktyke waar beskuldigdes in korrektiewe geriewe eerder as polisieselle aangehou word. Sodoende verbeter veiligheid, infrastruktuur word beskerm en die omstandighede van aanhouding verbeter.

Bronne in die polisie het kommer uitgespreek oor die huidige toestand van aanhoudingselle en verwys na die vinnige verspreiding van siektes onder aangehoudenes weens oorbevolking. Die bronne het ook kommer uitgespreek oor die veiligheidsrisiko’s vir beamptes, asook skade aan infrastruktuur wat die risiko vir ontsnapping verhoog.

“Die situasie is so benard dat ons as polisiebeamptes nie die selle kan deursoek sonder die hulp van die spesiale taakmag vir ekstra mannekrag nie,” het een beampte gesê. – [email protected]