Nampol soek 1 000 nuwe lede

Die Namibiese polisie (Nampol) het ŉ reuse aanstellingsveldtog afgeskop wat volgens die inspekteur-generaal van die Namibiese polisie, Joseph Shikongo, meer as ŉ duisend lede tot die polisiemag se mannekrag sal voeg. Shikongo het dié aankondiging die afgelope Vrydag by die Israel Patrick Iyambo-polisiekollege in die hoofstad gemaak. Hierdie inisiatief, gesteun deur die sentrale regering, is nodig omdat die polisiemag besig is om vinnig te krimp, sê hy. “Die mag sal ook hulpbronne vir opleiding en heropleiding van lede in verskeie dissiplines prioritiseer, veral met die klem op prosedure en prosesse van misdaadbekamping en -ondersoeke, dissipline, kliëntediens en ook bestuur, oorsig en beheer,” sê hy. BEVORDERINGSBy dieselfde geleentheid is die bevordering van verskeie polisiebeamptes aangekondig. Adj.komm. Naomi Katjiua, koördineerder van misdaadondersoeke in die Oshikotostreek, word oorgeplaas na die direktoraat van kriminele ondersoeke by die nasionale hoofkantore in Windhoek. Adj. komm. Titus Kambidhi Ekandjo word bevorder om haar posisie in die streek oor te neem. Verder tree adj. komm. Moses Kashala, die hoof van die polisie se spesiale veldmag in die Oshanastreek, af en hoofinspekteur Martha Ndineleo Kampolo word bevorder na die vlak van adjunk-kommissaris om die leisels by hom oor te neem Boonop word 51 polisiebeamptes bevorder na die nuwe rang van senior inspekteur, insluitend 20 stasiebevelvoerders, sewe bevelvoerders van die kriminele ondersoekeenhede en 24 bevelvoerders van spesiale veldmag-eenhede landswyd. Volgens Shikongo het die hergradering van poste in 2013 ’n gaping tussen hoofinspekteur- en inspekteurvlak gelaat, wat nou só gevul word. Die nuwe struktuur van die Namibiese polisiemag is sedert 1 Maart van krag terwyl ander aanstellings op 1 April in werking getree het.VERANTWOORDELIKHEIDHy waarsku hooggeplaaste polisiebeamptes dat groot verantwoordelikheid met hul nuwe range gepaard gaan, insluitend aanspreeklikheid, toewyding en eerlikheid. “Julle moenie nou ontspan en voel julle is die baas nie! Wat julle behoort te onthou, is dat julle as polisiebeamptes die mense moet dien en beskerm,” sê hy. Hy moedig die nuwe bevelvoerders aan om as voorbeeld te dien en die mas op te kom wat taktiek en strategie betref om te verseker Nampol bly “relevant in ’n moderne polisiëringswêreld,”. Terselfdertyd het Nampol ook Vrydag 750 poste vir kadet-konstabels begin adverteer. Die polisiemag soek Namibiërs tussen die ouderdomme van 18 en 35, wat ten minste 25 punte en ’n E-simbool in Engels deur die voormalige graad 12-stelsel of die nuwe graad 11-sertifikaat bereik het. Verder moet die kandidate gesond wees, seker wees hulle is nie swanger nie, geen kriminele rekord hê nie en gewillig wees om opleiding en ontplooiing selfs in vergeleë dele van die land deur te maak. ‘n Lisensie om swaarvoertuie te bestuur (C1,CE) sal in hulle guns tel.Verder sal kandidate met kwalifikasies in polisiewerk, die bekamping van geldwassery, rekeningkunde en finansiële bestuur ook voorkeur geniet, saam met kandidate wat rekenaarstudie, kubermisdaad en digitale forensiese ondersoeke studeer het. Ou speurders jonger as 50 word gesoek, saam met maatskaplike werkers, musikante wat by die polisieorkes kan aansluit, en kandidate met sportvernuf. Die sperdatum vir aansoeke is 2 Mei 2023.augetto@republikein.com.na

Nampol soek 1 000 nuwe lede

Kommentaar

Republikein 2026-02-03

Meld asseblief aan om kommentaar te lewer

Nampol soek 1 000 nuwe lede

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.