Nampol: Daar is kos in aanhoudingselle

Die Namibiese polisie (Nampol) het bewerings ontken dat mense in aanhoudingselle by die Otjomuise-polisiestasie in die hoofstad vir drie weke geen kos ontvang het nie. 

Die politieke aktivis Michael Amushelelo het op sosiale media verklaar dat hy klagtes van familielede ontvang het wat beweer dat gesinslede elke dag kos na aangehoudenes in Otjomuise moes bring sodat hulle nie honger ly nie.

Nampol se hoofwoordvoerder, adjunkkommissaris Kauna Shikwambi, het hierdie bewerings as ongegrond bestempel. 

“Verhoorafwagtende aangehoudenes in al ons aanhoudingselle ontvang steeds maaltye drie keer per dag soos voorgeskryf,” het sy gesê. 

“Al kan daar soms uitdagings wees met betrekking tot die voldoende hoeveelheid kos of vertragings in aflewering deur verskaffers, word daar altyd reëlings getref om te verseker dat alle verhoorafwagtende aangehoudenes van kos voorsien word.”

Daarbenewens is daar regulasies wat families toelaat om gedurende besoektyd kos na hul familielede te bring. 

“By Otjomuise, byvoorbeeld, word families toegelaat om op Woensdae en Sondae kos te bring.” 

Niks behoort families te verhinder om hul verhoorafwagtende familielede in hierdie opsig te ondersteun nie, het Shikwambi bygevoeg. Sy het familielede daaraan herinner dat die kos wat hulle na die aanhoudingselle bring, aan inspeksie onderhewig is om die insmokkel van verbode of onwettige items te voorkom.

Die polisiewoordvoerder het Amushelelo en ander versoek om hulle “te weerhou van pogings om die beeld van die Nampol deur ongegronde bewerings of waninligting wat onnodige openbare wantroue kan skep, te beswadder”. 

Indien daar enige ernstige bekommernisse deur families of enigiemand waargeneem word, moet sulke sake amptelik by die stasiebevelvoerder, streekbevelvoerder, of die kantoor van die inspekteur-generaal, of by haar  aangemeld word, het sy bygevoeg. 

“Die bedoeling behoort altyd te wees om die publiek op ’n konstruktiewe wyse te help. Dit is daarom raadsaam om eers inligting by die betrokke owerhede te verifieer voordat daar gehaas word om onbevestigde of valse bewerings op sosiale media te publiseer,” het Shikwambi benadruk.

– [email protected]