‘Moenie drink en bestuur’

Padongelukke eis volgens data gemiddeld een lewe per dag in Namibië met ’n geraamde 30% van ongelukke wat met alkohol verband hou.

Die statistiek is deur die uitvoerende hoof van die Namibia Road Safety Forum (NRSF), Horst Heimstadt, gedeel tydens die bekendstelling van ’n nuwe program verlede week wat daarop gemik is om dronkbestuur te takel.

Heimstadt het gesê ’n oorsig van ongelukdata het bevind dat daar gemiddeld sewe ongelukke daagliks in die land plaasvind, wat 12 beserings en 1,2 sterftes tot gevolg het.

“Volgens die Wêreldgesondheidsorganisasie (WHO) se wêreldwye statusverslag oor padveiligheid 2023, word beraam dat meer as 30% van ongelukke onder die invloed van alkohol kan behels,” het hy gesê.

In reaksie op die groeiende padveiligheidskommer het Namibia Breweries Limited (NBL), die NRSF en die verkeersafdeling van die Namibiese polisie (Nampol) die program vir die evaluering en afdwinging van bestuur onder die invloed (DUI) ingestel.

STRENGER OPTREDE

Die program, wat van Julie tot Januarie 2027 sal duur, sal nege kontrolepunte oraloor die land instel.

Beamptes sal asemtoetse doen en bestuurders se lisensies, veiligheidsgordels en die padwaardigheid van voertuie inspekteer, insluitend die toestand van band.

“Padveiligheid bly een van die mees uitdagende openbare veiligheidstruikelbokke waarmee ons land te kampe het,” het Nampol se verkeershoof, kommissaris Petrus Swartz, gesê.

“Die boodskap van die polisie bly eenvoudig en duidelik: As jy drink, moenie bestuur nie. As jy bestuur, moenie drink nie,” het hy gesê.

NBL se besturende direkteur, Walder von Lieres, het gesê die maatskappy bevorder al meer as 20 jaar verantwoordelike drink.

“By Namibia Breweries Limited is ons standpunt duidelik en konsekwent: Ons ondersteun verantwoordelike en matige alkoholverbruik, maar wanneer jy bestuur, moenie drink nie, en wanneer jy alkohol drink, moet jy nooit bestuur nie,” het hy gesê.

Von Lieres het gesê die maatskappy se verbintenis tot verantwoordelike drink het ’n langdurige vennootskap met die Motorvoertuigongeluk (MVA)-fonds ingesluit.

– [email protected]