Seuntjie sterf tragies onder wiele
Nuusredaksie
Twee kinders is die naweek tydens ongelukke raakgery, van wie een tragies gesterf en die ander een beseer is nadat die verdagte glo van die toneel weggejaag het.
Op Tsandi in die Omusatistreek het ’n eenjarige babaseuntjie Vrydagoggend gesterf nadat hy deur ’n bestuurder wat uit ’n oprit uitgery het, omgery is. Volgens die Namibiese polisie (Nampol) se misdaadverslag van die naweek, het die seuntjie op die toneel gesterf.
Die bestuurder was klaarblyklik ’n lid van dieselfde huishouding en die kind se familie het die ongeluk aanskou. Die polisie ondersoek die voorval as ’n saak van strafbare manslag.
’n Vierjarige kind van Groot Aub het naelskraap ’n soortgelyke lot vrygespring. Volgens Nampol het die verdagte Saterdagmiddag oor die seun gery en van die ongelukstoneel gevlug. Die kind is beseer.
Die bestuurder wat deur Nampol vir roekelose bestuur en versuim om ná die ongeluk na die beseerde persoon om te sien, ondersoek word, is aan die owerhede bekend.
Op Keetmanshoop het ’n 39-jarige man volgens die polisie sy vriendin (ook 39) glo tydens ’n rusie vermoor. Die slagoffer is klaarblyklik aan inwendige beserings dood. Die verdagte sou gister sy eerste verskyning in die hof maak.
Op Ndama in Kavango-Oos ondersoek die polisie ’n saak van poging tot moord nadat twee verdagtes ’n 36-jarige man na bewering met messe aangeval het.
Die slagoffer is in ’n kritieke toestand in die hospitaal. Een verdagte is steeds op vlug en ’n 19-jarige is in hegtenis geneem.
VERKRAGTINGS
Nampol het ook verskeie verkragtings aangemeld: Op Maltahöhe is twee minderjariges, agt en 11 jaar oud, na bewering deur ’n onbekende aanvaller verkrag.
Op Okahandja is ’n 21-jarige vrou glo Vrydagnag aangeval en verkrag. Die verdagte is steeds op vrye voet.
Drie onbekende verdagtes is ook nog op vrye voet nadat hulle vroeg Saterdagoggend ’n 23-jarige vrou na bewering op pad huis toe in Outjo aangeval en verkrag het.
Op Oshakati is ’n 50-jarige Namibiese man en ’n 26-jarige Angolese vrou by ’n mark in hegtenis geneem vir die onwettige handel in beheerde wildprodukte. Volgens die polisie het hulle juweliersware van ivoor sonder ’n permit verkoop het.
Nampol het ook verskeie inbrake en diefstalle aangemeld, onder meer op Rundu, Ndama, Mariental, Katutura en Wanaheda. Op Grootfontein het verskeie mans, gewapen met ’n pistool, Vrydagaand glo ’n kroeg beroof en met kontant gevlug. Geen inhegtenisnemings is nog gemaak nie.
GEEN DIESEL
Sondagaand het boere in die Maltahöhe-distrik ’n verdagte vragmotor met vee vanaf Helmeringhausen in die ||Kharasstreek opgemerk en die polisie op Maltahöhe ingelig. Polisiebeamptes kon egter nie na die toneel uitgaan om die voorval te ondersoek nie, want hulle het glo nie diesel in hul voertuig gehad nie. Boere was genoodsaak om die polisiebeampte na die toneel uit te vat.
Republikein het gisteroggend aan Hardap se streekbevelvoerder, adjunkkommissaris Tudor Kotungondo, gevra of daar wel nie diesel vir polisievoertuie op Maltahöhe beskikbaar is nie.
“Dis maar een van daai dae. Die diesel is nog nie deur die verskaffer by die Maltahöhe-polisiestasie afgelewer nie, so hulle sit sonder brandstof.”
Hy het gesê die brandstof sou moontlik eers gister afgelewer word.
“Ek waardeer die boere wat in sulke omstandighede die polisie se hand kan vat alhoewel dit hoofsaaklik ons primêre taak is,” het Kotungondo gesê.
Volgens boere in die omgewing is dit egter ’n algemene probleem: “Daar is nooit voertuie, brandstof of bande dat hulle kan ry nie.”
Die vragmotor het perde vervoer, maar was nie ontsmet volgens die regulasies vir die bekamping van die verspreiding van bek-en-klouseer nie. Een van die boere het die vragmotor ontsmet.


Kommentaar
Republikein
Geen kommentaar is op hierdie artikel gelaat nie