Polisiehoës ontduik vrae oor dronkbestuur-voorval

Elizabeth Joseph – Grootkoppe in die Khomas-polisie het Dinsdag joernaliste van bakboord na stuurboord gestuur rakende ernstige bewerings dat ’n stasiebevelvoerder glo junior verkeersbeamptes beveel het om nie ’n “smoordronk”-staatsbeampte aan te kla nie.WhatsApp-boodskappe op ’n polisiegroep wys talle beamptes se misnoeë oor die feit dat die bestuurder, mnr. Nande Kapolo, laat gaan is – ten spyte van sy beweerde alkoholvlak van 1,69 mg/l, wat ver bo die wettige perk van 0,37 mg/l is. Die rybewys wat Kapolo, ’n werknemer van die ministerie van binnelandse sake, immigrasie, veiligheid en sekuriteit, in sy besit gehad het, het glo reeds in Mei vanjaar verval.“Hierdie man is deur nuwe [rekrute] in hegtenis geneem... het geweier om ’n asemmonster te verskaf, in die stryd om hom by die hospitaal te kry, het die stasiebevelvoerder van Otjomuise [polisiekantoor] opdrag gegee dat hy vrygelaat moet word,” het een beampte op die WhatsApp-groep gesê.“Hierdie kwessie het die beamptes gedemoraliseer en hulle het opgegee op operasies en padblokkades,” het die beampte voorts geskryf.Die hoofinspekteur van die Khomasstreek se verkeerspolisie, Hiiko (geen naam verskaf), het in reaksie op die groep gevra: “Wat was die rede wat die Otjomuise-stasiebevelvoerder gegee het? Dit is teenstrydig met die doel van geregtigheid.”By navraag deur ons susterkoerant Namibian Sun oor of sy kantoor die saak ondersoek, het Hiiko geweier om kommentaar te lewer en gesê hy is met verlof.‘LIG MY IN’Stasiebevelvoerder Rauha Hamunyela van die Otjomuise-polisiekantoor, het gesê die voorval is “nuus” vir haar voor sy die oproep beëindig het.Skermgrepe van die gesprek wys hoe die Khomas-polisie se streekbevelvoerder, kommissaris David Indongo, vir meer besonderhede oor die aangeleentheid vra.“Kan iemand my inlig oor hierdie saak? Ek is ontsteld daaroor.“Asseblief, ek wag, bevelvoerders,” het Indongo gesê.Hy het verder geskryf: “Hoofinspekteur Hiiko, bel my as jy inligting oor hierdie saak het sodat ek daardie bevelvoerder na die DIG OPS [vermoedelik die adjunk-inspekteur-generaal vir operasies] kan neem sodat sy beter kan verduidelik of sy die mandaat het om met verkeerskwessies in te meng.” Indongo het Dinsdag by navraag gesê hy het nie sy beamptes genader vir besonderhede oor die aangeleentheid nie.“Ek hoef nie te bel om op hoogte gebring te word nie. Ek moet net gebel word en ingelig word,” het hy gesê.REDESIndongo het volgehou daar kon ’n goeie rede gewees het waarom so ’n besluit geneem is, en gesê “elke saak moet op sy eie meriete hanteer word”.Hy het verder beklemtoon daar is gevalle waar dronkbestuurders nie in hegtenis geneem word nie, maar eerder huis toe vergesel word.“Die redes is om ongelukke te vermy en ook vir die bestuurder se eie veiligheid,” het hy gesê, sonder om te verduidelik hoekom ander besope bestuurders dikwels in hegtenis geneem word. – republikein@republikein.com.na

Polisiehoës ontduik vrae oor dronkbestuur-voorval

Kommentaar

Republikein 2025-05-01

Meld asseblief aan om kommentaar te lewer

Polisiehoës ontduik vrae oor dronkbestuur-voorval

Kommentaar

Republikein 2025-05-01

Meld asseblief aan om kommentaar te lewer

MELD AAN

Advertensie