Polisie verskerp stryd teen kubermisdaad

Te midde van ’n groeiende tendens van aanlyn seksuele uitbuiting het die Namibiese polisie (Nampol) onlangs ’n vyfdaagse werkwinkel op Swakopmund aangebied om rolspelers op te lei in die bekamping van aanlyn kindermishandeling en verwante digitale misdade. 

Ongeveer 45 polisiebeamptes en maatskaplike werkers het dit bygewoon. Die opleiding, aangebied deur Nampol se eenheid vir kubermisdaad binne die direktoraat van misdaadondersoeke (CID), het daarop gefokus om eerste reageerders toe te rus met sleutelvaardighede om slagoffers te identifiseer, digitale bewyse te hanteer en op kuberverwante oortredings te reageer. 

Senior inspekteur Gabriel Paxula van Nampol het gesê die inisiatief spruit voort uit die toenemende voorkoms van aanlyn seksuele uitbuiting van kinders, wat ’n dringende bekommernis vir wetstoepassing geword het. “Hierdie soort misdaad is ’n nuwe tendens en ons het besluit om inligting aan lede van die Namibiese polisie en belanghebbendes oor te dra sodat hulle beter toegerus is om te reageer,” het hy gesê. 

Die opleiding is spesifiek gemik op stasiebevelvoerders, veldopleidingsbeamptes en gemeenskapsbeamptes, asook amptenare van die ministeries van geslagsgelykheid en kinderwelsyn en gesondheid en maatskaplike dienste, wat dikwels die eerste reageerders in sulke sake is. Paxula het verduidelik dat die program ook gefokus het op mensehandel, die wet op Kindersorg en -beskerming, en die verkragtingswet, terwyl dit ’n platform gebied het vir deelnemers om uitdagings wat in die veld ervaar word, te bespreek. 

Die streekbevelvoerder van Erongo, kommissaris Nikolaus Kupembona, het die belangrikheid beklemtoon om die kennis wat opgedoen is, toe te pas. “Die ware waarde van die opleiding sal nie gemeet word aan die bywoning of voltooiing [van die program] nie, maar aan hoe doeltreffend julle dit wat julle geleer het in julle daaglikse werk toepas,” het hy gesê. 

Kupembona het bygevoeg dat elke saak wat hanteer word, elke slagoffer wat ondersteun word en elke stuk bewys wat behoorlik bestuur word, bydra tot geregtigheid en die beskerming van kwesbare persone. 

Die opleiding vorm deel van voortgesette pogings om Namibië se reaksie op kubermisdaad, geslagsgebaseerde geweld en kinderbeskerming in ’n toenemend digitale wêreld te versterk.

– [email protected]