Nangolo Simeon FOTO VERSKAF
Nangolo Simeon FOTO VERSKAF

Polisie keer ontsnapte ná byna twee jaar vas

Saak tot 28 Januarie 2027 uitgestel
Die hoof van misdaadondersoeke in die Oshanastreek het die soektog na Simeon Nangolo as ’n “kat-en-muis”-speletjie beskryf.
Tuyeimo Haufiku

’n Man wat volgens die Namibiese polisie, byna twee jaar lank arrestasie ontduik het, is Maandagoggend by ’n huis op Ekuku naby Oshakati, weer in hegtenis geneem.

Dit volg enkele dae nadat gewapende rowers N$56 141 volgens die polisie van ’n man buite ’n bank se OTM op Oshakati gesteel het.

Simeon Nangolo, ook bekend as Osama, is saam met nog vier ander verdagtes in in hegtenis geneem.

Die hoof van misdaadondersoeke in die Oshanastreek, adjunkkommissaris John Matongwe, het die soektog na Nangolo as ’n “kat-en-muis”-speletjie beskryf.

“Sy geluk het hom in die steek gelaat,” het Matongwe gesê.

Hy het gesê ondersoekers is sedert Nangolo se ontsnapping uit aanhouding in Desember 2024 op dié glyjakkals se spoor. Volgens die inligting wat die polisie verskaf het, het hy aanklagte in die gesig gestaar wat rooftogte en moord behels.

Terwyl Nangolo op vrye voet was, word hy daarvan verdink dat hy ander rooftogte gepleeg het, wat hom weer op die polisie se radar geplaas het. Hy word ook daarvan verdink dat hy betrokke was by ’n rooftog by Rani Mini Market in Okahao.

“Wanneer die polisie inligting ontvang het oor waar hy is, het Nangolo die gebied reeds verlaat teen die tyd dat beamptes opgedaag het,” het hy gesê. Die Okahao-rooftog is in Junie aangemeld.

Ondersoekers moet nog uiteensit watter aanklagte hy en die vier ander verdagtes ná Maandag se arrestasies in die gesig sal staar.


BOTSING

Die jongste rooftog het verlede week buite ’n plaaslike bank se OTM op Oshakati plaasgevind. Die polisie sê gewapende verdagtes het ’n man voorgekeer wat op die punt was om kontant in te betaal. Die verdagtes het glo skote afgevuur, ’n motorband stukkend gesny en sy rugsak oopgeskeur voordat hulle N$56 141 gegryp en in ’n wit VW Polo gevlug het.

Hul ontsnapping het ’n verdere wending geneem toe die Polo met ’n Toyota Corolla gebots en ’n stilstaande VW Golf 6 getref het. 

Die verdagtes het glo die vensters van die Golf flenters geskiet, die vroulike bestuurder met geweld uitgedwing en met haar motor weggejaag.

Die polisie het later die motor verlate in Oshakati-Wes gevind. Hulle sê die verdagtes het na ’n wagtende wit Toyota Camry oorgeklim en ontsnap. 

Vuurwapens en ’n mes wat vermoedelik in die rooftog gebruik is, is teruggevind, maar die polisie het gesê die gesteelde kontant is nog nie teruggevind nie.

Nangolo het Dinsdag in die landdroshof op Ondangwa in verband met sy ontsnapping verskyn. Sy saak is tot 28 Januarie 2027 vir regshulp en verdere ondersoeke uitgestel.

– [email protected]

Kommentaar

Republikein 2026-11-16

Geen kommentaar is op hierdie artikel gelaat nie

Meld asseblief aan om kommentaar te lewer