Misdaad eis verskeie lewens

Verskeie sterftes, geweldsmisdade en dwelmverwante inhegtenisnemings is oraloor Namibië gedurende die naweek van 13 tot 15 Maart 2026 aangeteken, volgens die jongste misdaadverslag wat deur die Namibiese polisie (Nampol) uitgereik is. 

Die woordvoerder van Nampol, adjunk-kommisaris Kauna Shikwambi, het gesê dit het gewissel van noodlottige padongelukke tot vermoedelike verkragting, moord, huisbraak en sake van dwelmbesit in verskeie streke. 

NOODLOTTIGE VOORVALLE

Die polisie ondersoek verskeie noodlottige padverwante voorvalle. 

In Nkurenkuru het ’n voetganger gesterf nadat hy Vrydagnag langs die B10-pad naby Mayara-nedersetting deur ’n Toyota Hilux GD6-dubbelkajuit getref is, terwyl hy na bewering die pad oorgesteek het. 

In die Kavango-Oosstreek het die sewejarige Thifura Angeline Mushinga by Shadimbungu-nedersetting in Divundu gesterf nadat sy glo deur ’n Nissan Hardbody-voertuig getref is. Die polisie het gesê die kind het na bewering in die pad gehardloop. 

’n Afsonderlike geregtelike ondersoek is geopen ná die dood van ’n Duitse burger by Sesriem Canyon Saterdagmiddag. Volgens Shikwambi het die 29-jarige Sven Thomas oor borspyn gekla voordat hy onder ’n boom gaan rus het, waar hy later oorlede is. 

Nog ’n geregtelike doodsondersoek is op Walvisbaai aangeteken ná die 31-jarige Maxsun van Staden binne sy voertuig gesterf het nadat dit met ’n stilstaande motor gebots het. 

Intussen ondersoek die polisie ’n moord wat laat Vrydagnag in Rehoboth aangemeld is. Die 35-jarige Michael Pieters, ook bekend as Kanarob, is dood nadat hy tydens ’n konfrontasie in Blok E ’n steekwond aan sy bors opgedoen het. Die polisie het gesê die konfrontasie het na bewering plaasgevind nadat die oorledene die verdagte probeer beroof het, waarna die verdagte hom gesteek en toe van die toneel gevlug het. 

In Oshakati is ’n 48-jarige man in verband met die verkragting van ’n 17-jarige meisie by Omahenene-nedersetting Vrydagmiddag in hegtenis geneem. Die verdagte, wat glo ’n buurman van die vermeende slagoffer is, het na bewering die meisie gedwing om saam met hom na sy huis te gaan, waar die verkragting glo plaasgevind het. Hy bly in polisieaanhouding terwyl die ondersoek voortduur. Verskeie dwelmverwante arrestasies is ook landswyd aangeteken. 

Op Lüderitz is ’n verdagte in hegtenis geneem nadat die polisie na bewering dagga wat in die grond begrawe was, by Spokiesdorp ontdek het. 

Later dieselfde dag is twee mans by ’n polisiekantoor in hegtenis geneem nadat hulle na bewering probeer het om dagga, wat in kos versteek was, in te smokkel. 

Op Khorixas is ’n 34-jarige vrou in hegtenis geneem nadat dagga na bewering tydens ’n deursoeking in ’n pakkie binne ’n voertuig ontdek is. 

Nog ’n verdagte is langs die Kamanjab-Outjo (C40)-pad in hegtenis geneem nadat die polisie na bewering dagga en Mandrax-tablette in sy besit gevind het.

Op Keetmanshoop is ’n 26-jarige man in hegtenis geneem nadat hy na bewering probeer het om van Mandrax-tablette en dagga ontslae te raak deur dit oor ’n heining te gooi. 

HUISINBRAKE

Twee voorvalle van huisinbrake is vroeg Saterdagoggend in die Ondangwa-gebied aangemeld. 

Op Ongwediva het verdagtes na bewering deur ’n slaapkamervenster toegang verkry en ’n selfoon en twee skootrekenaars gesteel.

In ’n afsonderlike voorval op Olunkono is juweliersware, elektriese toerusting en skoene uit ’n huis gesteel. 

In Windhoek se Brakwater-gebied het verdagtes by sakepersele ingebreek en na bewering onder meer ’n kluis en maatskappydokumente gesteel.

Die polisie ondersoek ook die diefstal van ’n Toyota-bakkie en huishoudelike items uit ’n huis in die Oshandubala-nedersetting, wat na bewering vir ’n lang tyd onbewoon is.

POGING TOT MOORD

Intussen is ’n 20-jarige man in hegtenis geneem vir poging tot moord ná ’n messteekvoorval by Ekulo-nedersetting op Omuthiya Saterdagaand. 

Die slagoffer, ’n 36-jarige man, is na bewering met ’n okapi-mes gesteek nadat ’n rusie uitgebreek het terwyl die twee tuisgebroude alkohol gedrink het. Die slagoffer is steeds in die hospitaal en ontvang mediese behandeling. 

Shikwambi het gesê die polisieondersoeke na al die aangemelde voorvalle is steeds aan die gang.

– [email protected]