Ma se pyn ná grafskending

’n Groot Aub-familie is gedwing om weer een van die donkerste oomblikke van hul lewens te herleef nadat die graf van hul seun, Willem Modise, oopgegrawe is en sy kis en oorskot ontbloot is.Die ontstellende ontdekking is Woensdagoggend gemaak toe ’n gemeenskapslid wat die Groot Aub-begraafplaas skoonmaak, ’n groot gat in een van die grafte met die kis sigbaar opgemerk het en die polisie in kennis gestel. Volgens die Namibiese polisie se hoofwoordvoerder, adjunkkommissaris Kauna Shikwambi, het beamptes wat op die toneel was, gevind dat die graf oopgegrawe is met ’n hoop uitgegrawe sand langsaan. Ondersoekers het die tekkiespore gevolg wat van die graf af weglei, totdat die spoor nie meer gevolg kon word nie. Polisielede en forensiese patologiebeamptes het die toneel gefynkam voordat die oorskot verwyder is. Geen inhegtenisnemings is gemaak nie en die ondersoek na vermoedelike grafskending duur voort. Vir Willem se ma, Gertrud Modise, het die skokkende ontdekking wonde oopgeruk wat, volgens haar, nooit werklik genees het nie. “Eerstens het ek nie antwoorde gekry oor hoe my seun gesterf het nie en nou moet ek dit sien,” het sy emosioneel gesê. “Dit maak my seer as ’n ma. Dit is ’n pyn wat niemand kan verduidelik of my mee kan troos nie.” Volgens Modise is haar seun op 8 Januarie 2023 in Swakopmund dood aan beweerde selfdood, nadat hy glo dronk op straat in Swakopmund gevind en in polisie-aanhouding geneem is. “Hulle het vir ons gesê hy het ’n hemp gebruik om homself op te hang. Ons het vir foto’s gevra, maar hulle het gesê hulle sal vir ons die foto’s ná die begrafnis gee,” het sy beweer. Sy het verder beweer dat toe die familie sy liggaam by die lykshuis voor die begrafnis besigtig het, hulle kneusplekke op sy knieë en tone opgemerk het, asook bloed op sy knieë. “Ons wou foto’s neem, maar ons is aangesê om dit nie te doen nie,” het Modise gesê. Die familie sê baie vrae rondom Willem se dood bly onbeantwoord. “Daar is soveel dinge waarop ons nie antwoorde gekry het nie. Dit is verdag. Dinge maak nie sin nie,” het Modise gesê. “Ek het as ’n ma soveel vrae oor my seun se dood, maar omdat ons Christene is, het ons vir onsself gesê ons moet dinge aanvaar soos dit is.” Willem is op 21 Januarie 2023 begrawe. Meer as drie jaar later sê sy ma sy het nooit gedink sy sou weer moet toekyk hoe sy oorskot uit die graf verwyder word nie. “Die graf is oopgegrawe tot onder,” het sy gesê. “Nou moet ek my kind se bene en geraamte sien wat in die oopte rondlê. Wie dit ook al gedoen het, kom asseblief en sê net vir my hoekom. “Hoekom het jy ’n graf oopgemaak wat ek van my seun toegemaak het?” Sy het die ervaring beskryf as om die dag toe sy haar seun verloor het, weer te beleef. “Ek moet weer sien hoe hulle my seun se liggaam in ’n wit sak sit en hom weer na die lykshuis neem. Ek moet dit alles weer van voor af deurmaak,” het Modise gesê.“Dit is vir my soos ’n herbegrafnis. Ons moet my seun weer begrawe.” Die familie het ook kommer uitgespreek oor die klaarblyklike gebrek aan sekuriteit by die begraafplaas en gesê daar is geen sekuriteitswagte wat die terrein beskerm nie. Die polisie het nog nie ’n moontlik motief vir die grafskending aangedui nie en het ’n beroep gedoen op enigiemand met inligting wat in die ondersoek kan help, om na vore te kom. Terwyl ondersoekbeamptes na die verantwoordelikes soek, sê die Modise-familie hulle berei hulle weer voor vir ’n begrafnis wat hulle nooit gedink het hulle twee keer sou moes beleef nie.– desmarius@nma.com.na

Ma se pyn ná grafskending

Kommentaar

Republikein 2026-09-09

Meld asseblief aan om kommentaar te lewer

Ma se pyn ná grafskending

Kommentaar

Republikein 2026-09-09

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.