Gevangene ontsnap weer
’n Gevangene wat klaarblyklik besig is om vir homself ’n naam as ’n gesoute “ontsnapper” te maak, het die polisie op Rundu verlede week weer op sleeptou gehad toe hy saam met ’n medegevangene die hasepad gekies het.
Dié gevangene is saam met nog ’n aangehoudene by die landdroshof afgelaai, toe die twee die vlaktes in is.
Hy het na bewering maande tevore op soortgelyke wyse ontsnap, met die polisie wat die blaam op beamptes plaas aan wie die bewaking van aangehoudenes toevertrou is.
Volgens die polisiebevelvoerder op Rundu, Hermine Muranda, kan geen tekort aan vuurwapens of hulpbronne verklaar hoe twee gevangenes wat onder polisiebewaking na die hof vervoer is, skielik op vrye voet is nie.
“Dit het gebeur as gevolg van nalatigheid van die polisie. Dit was ’n individuele fout,” het Muranda gesê.
Die ontsnapping het tydens ’n roetineprosedure plaasgevind, kort nadat aangehoudenes by die hof vir hul verskyning afgelaai is.
Die tweede ontsnapping onder soortgelyke omstandighede het die vraag by hofpersoneel laat ontstaan oor sekuriteit wanneer beskuldigdes by die hof afgelaai word. Kommer is geopper oor die potensiële gevaar wat dit vir personeel inhou wanneer aangehoudenes nie voldoende bewaak word nie.
Die personeel het Vrydag aan Republikein gesê dit blyk ontsnappings raak nou ’n gereelde verskynsel. Volgens hulle is polisielede wat by die hof ontplooi is, dikwels ongeërg in hul benadering tot sekuriteit.
Polisielede se pligte word soms ook sonder vuurwapens uitgevoer, met personeel by die hof wat vrees vir wanneer ’n beskuldigde gewelddadig raak of sou probeer ontsnap.
Personeel sê gewapende polisiebeamptes is meer sigbaar by die hof wanneer gespesialiseerde lede ontplooi word wanneer ’n bekende of gewoontemisdadiger in die hof verskyn.
Muranda het egter die bewering verwerp dat die landdroshof op Rundu die teiken van gereelde ontsnappings is.
“Dis nie ’n tendens nie. Dit is nie waar dat daar altyd ontsnappings is nie. Dit is eintlik baie seldsaam,” het Muranda gesê.
Volgens haar was sulke voorvalle die afgelope vier tot vyf jaar ’n seldsame verskynsel.
GEEN TEKORT AAN WAPENS
Sy het ook ontken die hof en sy personeel kon nie voldoende beveilig word nie weens ’n tekort aan toegang tot vuurwapens.
Volgens Muranda was daar vuurwapens beskikbaar vir lede om hul pligte uit te voer.
“Lede word nie vuurwapens geweier nie,” het sy gesê.
Muranda het gesê vuurwapens word nie op ’n permanente basis aan individuele polisiebeamptes uitgereik nie.
Gevolglik moet lede wat aan hofpligte toegewys is, dit by die polisiestasie uitteken wanneer dit nodig is.
“Dit is hul verantwoordelikheid, omdat hulle dit nie permanent by hulle het nie,” het Muranda gesê.
Hoewel beamptes opdrag kry om vuurwapens te dra, het sy gesê lede wat ongemaklik daarmee voel, nie gedwing word om dit te doen nie.
“As hulle dit nie doen nie, beskou ek dit ’n geval waar die individu nie ’n vuurwapen wil dra nie,” het sy gesê.
Volgens Muranda word ’n sterker teenwoordigheid en die ontplooiing van bykomende polisiebeamptes op ’n permanente grondslag by die hof opgeweeg teen behoeftes aan polisiëring elders op Rundu.
“Prakties gesproke het die polisie baie pligte,” het sy gesê.
“Hulle kan nie net op die perseel rondstaan om jou veilig te laat voel, terwyl misdade elders op die dorp gepleeg word nie.”


Kommentaar
Republikein
Geen kommentaar is op hierdie artikel gelaat nie