Drie word vermis in Erongo

“Daar is baie mense wat as vermis aangemeld word en dan onder onaangename omstandighede gevind word, soos Shanon Wasserfall wat vermis was en later in ’n vlak graf gevind is en [Matheus Sheehama] wie se liggaam uit die see gespoel het."Dit het hoofinspekteur Ileni Shapumba gister aan Republikein gesê en verder kommer uitgespreek oor nog drie persone wat onlangs as vermis aangemeld is in die Erongostreek.Een van die persone is 15-jarige Wyne Goreseb van Walvisbaai. Die polisie het gister om hulp gevra om hom op te spoor asook Lukas Junias (50) en Katrina Paulina Boois (64).Goreseb se ma sê hulle het verlede Saterdag omstreeks 16:00 besef dat hy nie by die huis was nie. Hy is ’n graad 8-leerling aan die Hoërskool Tutaleni en is laas in ’n swart en wit Adidas-sweetpak en swart Converse All Star-tekkies gesien. Enigiemand met inligting oor waar hy hom bevind, word gevra om inspekteur Mansie Amamub by 081 763 8188 te kontak of by hul naaste polisiekantoor aan te meld. Teen druktyd het Shapumba gesê die polisie is in die proses om inligting te bevestig nadat hy glo in Kuisebmond gesien is.Junias is laas op 12 Augustus by die plaas Schlesien-Noord in die Namib-Naukluft-omgewing gesien en Boois op 10 Augustus in die Otjimbingwe-omgewing.Enigiemand met inligting oor waar hulle is, word gevra om 081 290 2660 te kontak of by hul naaste polisiekantoor aan te meld.Oor Junias en Boois het hy gesê hulle “bly hoopvol en hou steeds aan soek”. POLISIE IS BEKOMMERDDié gevalle kom nadat ’n 24-jarige student Matheus Sheehama sowat drie weke lank vermis was en sy liggaam twee weke gelede uit die see gespoel het. Vyf mense is in verband met die voorval in hegtenis geneem en inwoners van Kuisebmond het daarna ’n vreedsame optog gehou oor die toenemende geweld op Walvisbaai.“Ons is bekommerd – veral oor jong mense wat blykbaar uit hul huise verdwyn,” het Shapumba gesê.Shapumba het ook kapsie gemaak oor jong meisies wat na hul kêrels gaan ná argumente by die huis. Hy sê baie ouers vertel ook nie die polisie die volle waarheid wanneer hulle hul kinders as vermis aanmeld nie.“Ouers bespreek nie die omstandighede wat daartoe gelei het dat hul kind die huis verlaat het met ons nie. Ons moet dit weet sodat ons die saak in sy geheel kan hanteer,” het hy gesê.Ouers en gemeenskapslede moet ook verantwoordelikheid neem in hul huise en op voetsoolvlak in hul gemeenskappe, volgens Shapumba.“Ons [die polisie] is toegewyd in ons diens aan die mense, maar ons het almal verantwoordelikhede en ons het ’n plig by die huis,” het hy gesê.Shapumba sê ook dat die dwelmverwante neigings in Walvisbaai se gemeenskappe kommerwekkend is.“Een van ons groot probleme is dwelms. Ons het ouer mense hier wat dwelms verkoop in plaas daarvan om lekkers te verkoop en kinders wat eerder as om lekkers en koekies te koop, dwelms koop. Ons glo hulle meng die dwelms ook met ander middels,” sê hy. Hy meen ook dat lede van die gemeenskap inligting van die polisie weerhou. “Ons is vinnig om te sê die polisie moet iets doen, maar wanneer die polisie opdaag is almal stil en niemand wil iets sê nie,” sê Shapumba.– irene-mari@nmh-hub.com.na

Drie word vermis in Erongo

Kommentaar

Republikein 2025-11-03

Meld asseblief aan om kommentaar te lewer

Drie word vermis in Erongo

Kommentaar

Republikein 2025-11-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.