‘Ons vrees vir ons lewens’

Vier jaar nadat hulle ’n geweldadige aanval in hul huis oorleef het, leef ’n paartjie van Swakopmund steeds in vrees en het al hul vertroue in die Namibiese regstelsel verloor.Die paartjie wat in Julie 2021 in hul huis oorval is, beskryf hul ervaring met die regstelsel as “onbegryplik en ’n versuim om aan die administrasie van geregtigheid te voldoen”. Volgens Riaan Booysen (68) en Elizabeth Rossouw (69) word die vervolging in hul saak – wat nou al vier jaar sloer – geteister deur vertragings, verminderde aanklagte en ’n gebrek aan kommunikasie aan die kant van die staatsaanklaers. Booysen sê die herhaalde vrylating op borgtog van verdagtes wat van geweldsmisdade verdink word, ten spyte van hangende sake soos die paartjie s’n, dui op ’n regstelsel “wat nie vir die slagoffers werk nie”. Dit het veroorsaak dat hulle hul vertroue heeltemal in die regstelstel verloor het. Die paartjie is op 13 Julie 2021 in hul huis oorval terwyl Rossouw op Zoom met ’n regstreekse aanlyn opleidingsessie besig was. Die drie verdagtes, Gabriel Stephanus Emvula, Dorian Iiyambo en Andreas Victor Kaushi, het hulle na bewering oorval nadat hulle ’n deur oopgemaak het om hul hond uit die huis te laat. Booysen is glo met ’n panga geslaan, aangerand en met ’n gebreekte tafelpoot in die gesig geslaan. Rossouw is na bewering op die grond vasgepen terwyl die mans glo op kontant en die sleutels van die kluis aangedring het. Die aanranding is gedeeltelik aanlyn deur Rossouw se instrukteur tydens die Zoom-vergadering aanskou, wat die polisie en die buurtwag in kennis gestel het. Dit het glo daartoe gelei dat die vermeende beskuldigdes binne 15 minute in hegtenis geneem is. Booysen, wat herhaaldelik tydens die aanval geslaan is, het diep snye aan sy kop en gesig opgedoen as gevolg van die panga-houe, asook ernstige kneusplekke en swelling. Hy is vir twee weke ná die aanval in die hospitaal opgeneem, waartydens hy ’n operasie ondergaan het om sy regteroog te red. Dokters het ook gewaarsku hy loop die risiko om sy oog weens die erns van sy gesig- en kopbeserings te verloor. Rossouw het kneus- en skaafplekke opgedoen gedurende die tyd wat sy tydens die aanval vasgepen en vasgehou is. Volgens Booysen het een van die twee polisieondersoekbeamptes vir wie die paartjie vol lof was, gesê die vermeende ringleier van die aanval, Andreas Victor Kaushi, het in 2017 uit aanhouding tussen die Walvisbaai-polisiekantoor en die hof ontsnap. Dit nadat hy na bewering in hegtenis geneem is vir roof met ’n ongelisensieerde vuurwapen. Hy sou glo later weer uit aanhouding ontsnap terwyl hy na die hof in Windhoek begelei is vir nog ’n ernstige misdaad. Nadat Kaushi weer in hegtenis geneem is, het hy in die landdroshof op Okahandja verskyn waar borgtog aan hom toegestaan is ten spyte van die feit dat hy ’n ontsnapte voortvlugtige was wat reeds twee keer uit aanhouding ontsnap het, volgens die ondersoekbeampte. Hy het glo ook nooit weer teruggekeer vir sy hofverskyning op die dorp soos bepaal deur sy borgtogvoorwaardes nie en is steeds ’n voortvlugtende. Die paartjie se frustrasie het verdiep toe Booysen en Rossouw dagvaardings ontvang het om op 19 Mei vanjaar in die landdroshof in Swakopmund te verskyn om teen die twee oorblywende beskuldigdes, Emvula en Iiyambo, te getuig. Met hul aankoms het hulle egter ontdek albei mans was reeds vry op borgtog en het vrylik in die gemeenskap rondbeweeg. Die oorspronklike aanklagte van poging tot moord en huisbraak met verswarende omstandighede is ook tot net roof verminder. Die saak is weer tot 9 Oktober uitgestel aangesien die prokureur wat deur die staat aangestel is om Emvula en Iiyambo te verteenwoordig nie van die Mei-verrigtinge in kennis gestel is nie.“Ons is nooit ingelig oor borgtog, aanklagte wat verminder word, of selfs hofdatums nie. Na vier jaar voel ons verwerp deur die stelsel wat veronderstel is om ons te beskerm,” het Rossouw gesê.Die paartjie het intussen ’n private prokureur aangestel en beplan om ’n siviele saak teen die drie beskuldigdes aanhangig te maak sodra die strafsaak afgehandel is.Tydens hul eerste verskyning het Kaushi, Emvula en Iiyambo skuld ontken.Network Media Hub (NMH) het vroeër berig oor die groeiende frustrasie onder polisiebeamptes oor die toestaan van borgtog aan verdagtes wat teregstaan op verskeie ernstige aanklagte, insluitend moord en gewapende roof.Volgens die die adjunk-polisiehoof, Elias Mutota, het sommige verdagtes “tot 10 sake” teen hulle, maar word herhaaldelik op borgtog vrygelaat sonder dat ondersoekbeamptes geroep word om te getuig.Die berig het verwys na verskeie verdagtes wat verlede maand in Windhoek in hegtenis geneem is vir poging tot gewapende roof en wat vry op borgtog was vir geweldsmisdade, insluitend dubbele moordaanklagte. Onder hulle was individue wat verbind is aan veelvuldige moorde, gewapende rooftogte en transitorooftogte.Mutota het gewaarsku dat sommige van die verdagtes wat onlangs in hegtenis geneem is, weer ten spyte van hul misdaadgeskiedenis, borgtog kry. “Dit is ontmoedigend vir die ondersoekbeamptes. En ek voel hulle pyn want ons is ook gefrustreerd,” het hy gesê. – republikein@republikein.com.na

‘Ons vrees vir ons lewens’

Kommentaar

Republikein 2025-10-03

Meld asseblief aan om kommentaar te lewer

‘Ons vrees vir ons lewens’

Kommentaar

Republikein 2025-10-03

Meld asseblief aan om kommentaar te lewer

MELD AAN

Advertensie