Wiskunde bly ’n kopseer

Jemima Beukes

Swak wiskunde-uitslae in ­Namibiese skole is lank al ’n bron van kommer, ’n probleem wat grootliks aan onderwysers se bevoegdheidsvlakke toegeskryf word.

Vanjaar lyk die prent­jie nie veel beter nie ná die jongste Namibië Senior Sekondêre Sertifikaat (NSSS)-uitslae bekend gemaak is.

Die ministerie van onderwys, kuns en kultuur het sy kommer uitgespreek oor die uiters lae slaagsyfers in wiskunde, met amp­telike statistiek wat aandui die situasie is so kritiek dat by sommige skole sewe uit elke 10 leerlinge wiskunde gedruip het.

Die ministerie se leier­skap glo ’n “­verkeerde benadering” word gevolg en onderwysers is nie “goed bekwaam” wanneer dit kom by die aanleer van die nodige ­wiskundevaardighede nie.

LEER

Die adjunk- uitvoerende direkteur in die ministerie, Edda Bohn, het kommentaar gelewer oor die kwessie en gesê die vak is van kardinale belang en daarom is dit verpligtend gemaak.

“Ons moet net die grondslagfase ­verbeter. [Die uitslae] is ver­skriklik, en dit wys dat onderwysers nie in staat is om dit oor die algemeen te hanteer nie. As jy wiskunde neem, is dit soos om jou moedertaal te leer; as die grondslag nie reg is nie, is dit uiters moeilik om dit voren­toe reg te kry,” het sy gesê ná die NSSC Gewone en Gevorderde Vlak se uitslae vrygestel is.

Bohn het gesê: “Ons het ’n verkeerde houding teenoor wiskunde. Dit is ’n verreikende probleem wat ons in die gesig staar. Met wiskunde is daar ’n besondere probleem met die houding teenoor die vak.”

GEBREK AAN

ONDERSTEUNING

Terwyl die ­ministerie die skuld gedeeltelik voor onderwysers se deure lê, beweer opvoedkundiges dat die owerhede nie genoeg doen om uitdagings te takel wat onderwysers in die klaskamers ondervind nie. Hierdie uitdagings sluit ’n hoë onderwyser-leerling-verhouding in, ’n gebrek aan ondersteuning van relevante opvoedkundige leiers, onvoldoende tyd wat vir wiskundelesse toegeken word, oorvol klaskamers, ’n gebrek aan dissipline onder leerlinge in wiskundeklasse, en ’n gebrek aan onderrighulpmiddels en -hulpbronne.

KOMMERWEKKENDE STATISTIEK

Die ­Gekombineerde Skool ­Schmelenville op Bethanie in die ||Kharasstreek het ’n druipsyfer van 70,6% vir wiskunde. Dit beteken sewe uit 10 leerlinge het nie die graad geslaag nie.

’n Uiteensetting van die jongste uitslae toon dat 29,4% ’n U-simbool gekry het, wat byna drie uit 10 leerlinge is, en 20,6% het onder­skeidelik G- en F-simbole ontvang.

In die Khomasstreek staan die Sekondêre Skool Dawid Bezuiden­hout voor ’n soortgelyke uitdaging, met 67,3% van sy ­leerlinge wat wiskunde druip, dit wil sê meer as vier uit elke 10 leerlinge, of twee uit elke drie.

By die Sekondêre Skool Wennie du Plessis in die Omahekestreek dui die uitslae daarop dat meer as die helfte van sy leerlinge wiskunde gedruip het – minstens een uit elke twee leerlinge het gedruip.

Sowat 21,3% het ’n U-simbool ontvang, 17,4% ’n G-simbool, en 13% het daartoe bygedra dat die wiskunde-druipsyfer net meer as 50% bereik het.

In die Kavango Oos- en Wesstreek het ongeveer 73,6% van leerlinge aan die Sekondêre Skool Rundu gedruip, met 50,5% wat ’n U-simbool ontvang het, 14,1% ’n G-simbool, en 8,02% ’n F. Dit beteken meer as twee uit drie leerlinge het wiskunde gedruip.

Die uitslae vir die Sekondêre Skool Caprivi in die Zambezistreek dui daarop dat elke tweede leerling wiskunde gedruip het, met 26,8% wat ’n U behaal het, 14% wat ’n G ontvang het, en 13,8% ’n F, wat die totale druipsyfer op 54,6 % te staan bring.

– republikein@republikein.com.na