‘Windhoek níé platsak’

Die Windhoek-munisipaliteit se geldsake is nie so beroerd soos die kantoor van die ouditeur-generaal se verslag dit wil laat blyk nie, voer die uitvoerende hoof van die munisipaliteit, Moses Matyayi, aan. In ’n verklaring wat Stad Windhoek (CoW) gister uitgereik het, lig Matyayi uit dat die ouditverslag wat verlede week in die parlement voorgelê is, vir die boekjaar tot 30 Junie 2021 is.Volgens hom het die situasie sedertdien verbeter. Selfs in terme van die ouditverslag in 2021 was dit die eerste ná 12 jaar waarin die hoofstad se finansies ’n gekwalifiseerde ouditverslag ontvang het.Voor 2021 het Windhoek se ouditverslae ’n vrywaring deur die ouditeur-generaal ingesluit.Die ouditeur-generaal, Junias Kandjeke, het nietemin die 2021-verslag gekwalifiseer weens ’n behuisingsfonds van N$206,3 miljoen waarvoor die stadsraad nie bates kon toon nie, die gebrek aan bewyse vir publiek-private-vennootskappe (PPP) met betrekking tot eiendom, toerusting, masjinerie en lenings, en op winste vir grondtransaksies van meer as N$17 miljoen wat nie behoorlik aangeteken is nie.Tog dring Matyayi daarop aan dat die stadsraad vorder met die toepassing van groter deursigtigheid en betroubaarheid van finansiële boekhouding.“Ons is trots daarop dat ons finansiële staat, in ooreenstemming met artikel 87 van die Wet op Plaaslike Owerhede van 1992 (Wet 23 van 1992) soos gewysig, naby is aan totale voldoening,” sê hy. Verder sê Matyayi dat die ouditeur-generaal se kantoor tans met 2022 se oudit besig is en dat “voorbereidings begin het om die 2023-oudit teen die einde van vanjaar af te handel,” sê hy. Matyayi het erken dat teen 30 Junie 2021 Windhoek se laste teen meer as 50 sent vir elke N$1 van sy bates oorskry het. Hy sê egter dat die munisipaliteit aandag daaraan gee. “Tot op hede het Stad Windhoek al ons agterstallige skuld aan die krediteure vereffen, insluitend groot verskaffers soos NamPower en NamWater, en ons is op datum met ons lopende rekeninge,” sê hy. Die uitstaande skuld van N$700 miljoen aan die regering, vir ’n lening wat weer uitgeleen is, is die onderwerp van deurlopende onderhandelinge met die sentrale regering, sê hy. Sonder dié skuld sou die verhouding tussen die hoofstad se laste en bates baie beter lyk, brei Matyayi uit. “Die stad het aansienlike vordering oor die afgelope twee boekjare gemaak, wat insluit om ons uitgawes doeltreffend te beperk, met die fokus op ons dienskoste en spesifiek geen salarisverhogings is in die laaste vier jaar sedert 2020 toegestaan nie,” sê Matyayi.“Ons gaan voort om krediteure en diensverskaffers betyds te betaal,” voeg hy by. Wat die behuisingsfonds betref, sê Matyayi die kwessie is veroorsaak deur die feit dat Windhoek nie ’n aparte rekening daarvoor gehad het nie, en daarom is terugbetalings in die hoofstad se bedryfsrekeninge inbetaal.“Die raad het dus besluit om raadsbehuising te herklassifiseer en die Build Together-fonds, wat sedert die 2020-’21-finansiële jaar saamgesmelt het met die opgraderingsprojek vir informele nedersettings, te behou: “’n Stap wat nou verseker dat behoorlike rekeningkundige praktyke vir die fonds gevolg word,” sê die uitvoerende hoof.In terme van PPP-grondverkope was daar verskille oor rekeningkundige standaarde tussen die ouditeur-generaal en Windhoek se stadsraad tot 2021, maar konsensus is bereik, en aanpassings is vanaf 2022 geïmplementeer, sê Matyayi.“Vir nou en in die afsienbare toekoms is Stad Windhoek ’n lopende bedryf. Ons is aktief besig om ’n finansiële herstelplan op te stel wat gemik is op finansiële volhoubaarheid op die lang termyn,” sê hy. – augetto@republikein.com.na

‘Windhoek níé platsak’

Kommentaar

Republikein 2025-07-07

Meld asseblief aan om kommentaar te lewer

‘Windhoek níé platsak’

Kommentaar

Republikein 2025-07-07

Meld asseblief aan om kommentaar te lewer

MELD AAN

Advertensie