Windhoek brei uit

Die Windhoek-stadsraad het tydens sy laaste vergadering op 29 Februarie 2024 goedkeuring gegee om die Rocky Crest-woonbuurt uit te brei. Rocky Crest Uitbreiding 8 sal suid van die bestaande woonbuurt gevestig word.Volgens die munisipaliteit sal die nuwe uitbreiding meer as 250 000 vierkante meter (sowat 25 hektaar) beslaan met tot 168 enkelresidensiële erwe, tesame met drie algemene residensiële erwe, twee erwe vir institusionele gebruik, een besigheidserf, 41 erwe vir beperkte besigheidsdoeleindes, vyf oop ruimtes en sewe erwe wat die munisipaliteit self sal gebruik.Sowat 28% van die 251 127 m²-grondoppervlakte sal volgens die munisipaliteit vir breë paaie gebruik word. Die gemiddelde grootte van die voorgestelde residensiële erwe is 442 m².Die woonbuurt sal grond beskikbaar hê vir ’n winkelsentrum asook vir ’n beroepsopleidingsentrum (VTC) en ’n kleuterskool. Die beperkte besigheidserwe sal geskik wees vir paneelklop- en spuitverfwerkswinkels, werktuigkundiges, pakhuise, skrynwerkdienste en sweiswerk.Straatname vir die nuwe woonbuurt is ook reeds voorgestel, met name soos Friend-, Companion-, Hope-, Trust-, Joy-, Achiever- en Faithstraat, om ’n positiewe beeld van die hoofstad te help skep.Die voorgestelde ontwikkeling is geleë langs die oostelike grens van Otjomuiseweg en langs die noordwestelike grens van Bernt Carlssonweg. Toegang tot die nuwe uitbreiding sal ook deur hierdie paaie verkry word.Dit sal egter nodig wees om ’n nuwe afdraai vanaf die westelike verbypad na Bernt Carlssonweg te skep. Hiervoor sal David Hosea Meroro-straat tot by Otjomuiseweg ook verleng moet word en Otjomuiseweg se oppervlak tot by Bernt Carlsson opgegradeer word.Die hoofstad se elektrisiteitsafdeling verwag dat twee 315 kVA-mini-substasies aanvanklik die nuwe woonbuurt sal kan bedien.Verder sal grootmaat-watertoevoer vanaf die Pionierspark-reservoir deur ’n 480 m-pypleiding gebring moet word, terwyl drie grootmaat-rioollyne van onderskeidelik 7,9 km, 2,4 km en 900 m gebou moet word.Windhoek se jongste uitbreiding sal ook voldoen aan die volhoubare stedelike vervoer-meesterplan. – augetto@republikein.com.na

Windhoek brei uit

Kommentaar

Republikein 2026-02-03

Meld asseblief aan om kommentaar te lewer

Windhoek brei uit

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.