Wenkbroue lig oor ‘DBV-heffing’

Die inwoners van Hentiesbaai is ontevrede met ’n N$15-heffing wat vandeesmaand op hul munisipale rekeninge verskyn het onder die titel “SPCA”. Die burgemeester, Lewies Vermaak, het by navraag verduidelik dat die bewoording van die heffing verkeerd is.“Die munisipaliteit het ’n fout begaan; dit moes glad nie onder die Dierebeskermingsvereniging (DBV) gewees het nie, maar onder die munisipaliteit self.“Die publiek moet ook verstaan dit gaan nie oor die DBV nie. Die DBV se naam is verkeerdelik gebruik; dit is eintlik ’n munisipale kwessie wat spesifiek met hondebeheer verband hou, met die doel om honde te monitor, te bestuur, te versorg en indien nodig, hulle van kant te maak. “Dit sluit in die hantering van alle kostes en om te verseker dat die honde lisensies het. Dit was ’n verkeerde optrede deur die munisipaliteit en die publiek is verkeerd ingelig.”RONDLOPERHONDE“Dit gaan daaroor om ’n honde-inspekteur aan te stel en ’n voertuig te verskaf om rondloperhonde op te spoor. Die honde word dan na die DBV geneem as hulle nie lisensies het nie.”Hy het verduidelik dat hierdie heffing reeds in die Staatskoerant van 15 Augustus 2023 gepubliseer is. “Ek het ’n vergadering met die munisipaliteit gehad en hulle het verduidelik dat hulle ook ’n brief aan sake-eienaars sal stuur om uit te klaar waaroor dit gaan en die doel daaragter. Die munisipaliteit het besluit om dit nie in ’n openbare vergadering met die gemeenskap te bespreek nie.“Alhoewel dit in 2021 bespreek en in 2023 besluit is, is dit nou in werking. Mense kan op hul rekeninge sien dit is sedert Februarie 2023 daar, maar met ’n nulsaldo, so die publiek is reeds bewus gemaak dat dit op hul munisipale rekeninge sou wees.” Vermaak het bygevoeg dat hulle alles sal uitklaar en die kwessie op die volgende raadsvergadering sal bespreek.“Dit is reeds verlede week op ons algemene vergadering bespreek en sal ook op die bestuurskomiteevergadering bespreek word.” ‘NIE GEKOMMUNIKEER’In ’n kennisgewing van die waarnemende uitvoerende hoof, Ignasia Florencia Neis, is verduidelik dat die tariewe vir die 2023-’24-boekjaar hersien is. Goedkeuring is glo van die ministerie ontvang en is amptelik op 15 Augustus 2023 in die Staatskoerant gepubliseer. “Gedurende die 2023-’24-boekjaar het die raad egter gekies om nie die goedgekeurde heffing van N$15 te implementeer nie. “In plaas daarvan is dit op N$0,00 vir daardie tydperk vasgestel. Die goedgekeurde N$15-heffing is daarna ingestel en vanaf die 2024-’25-boekjaar toegepas.”Die kennisgewing het verduidelik dat die rasionaal vir hierdie implementering insluit dat die heffing help om veeartsenydienste vir diere in die dorp te finansier om te verseker dat hulle die nodige veeartsenysorg ontvang.“Die geld word gebruik om dierebeheermaatreëls te verbeter, wat pogings vir wetstoepassing ondersteun en bydra tot openbare veiligheid.” ’n Aantal inwoners het gesê hulle het nie ’n probleem om die heffing te betaal nie, maar dit is nie aan hulle gekommunikeer nie. Hentiesbaai het nie ’n amptelike DBV-tak nie, maar Angels Hentiesbaai funksioneer as ’n DBV.– republikein@republikein.com.na

Wenkbroue lig oor ‘DBV-heffing’

Kommentaar

Republikein 2026-03-20

Meld asseblief aan om kommentaar te lewer

Wenkbroue lig oor ‘DBV-heffing’

Kommentaar

Republikein 2026-03-20

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.