Walvisbaai-dorpsraad skors twee bestuurders

Leandrea Mouers – Die besluit om die hoofbestuurder vir finansies, Frans !Gonteb, en die bestuurder van kredietbeheer, Johanna Shidute, Woensdag te skors, is Dinsdag tydens ’n raadsvergadering geneem.Dit is volgens die Walvisbaai-munisipaliteit om die aanstelling van die skuldinvorderaars, RedForce, te ondersoek.!Gonteb het by navraag vir kommentaar oor die aangeleentheid gesê die skorsing is “persoonlik en politiesgedrewe”.“As die ondersoek gaan oor die aanstelling van RedForce, hoekom word die waarnemende uitvoerende hoof nie ook geskors nie? Hoekom is dit selektief?”Hy sê verder dat hy met sy aankoms Woensdag by die kantoor deur die veiligheidswag aangesê is om na die waarnemende uitvoerende hoof, John Esterhuizen, se kantoor te gaan.“Die skorsing pla my nie, want ek het niks om weg te steek nie.”!Gonteb het bygevoeg dat die waarnemende uitvoerende hoof vir RedForce aangestel het.Die verkrygingsproses begin glo by die Verkrygingsbestuurseenheid (PMU), gevolg deur die tender-evalueringskomitee, dan die verkrygingsevalueringskomitee, wat dan aanbevelings aan die uitvoerende hoof maak.“Die waarnemende uitvoerende hoof het ’n fout begaan met die kennisgewing wat uitgereik is oor die beëindiging van RedForce se kontrak, met verwysing na ’n raadsbesluit.“Jy moet vra waar is daardie raadsbesluit. Die mosie was veronderstel om na die bestuurskomitee verwys te word aangesien dit wetlike en finansiële implikasies het. Die fout moet net reggestel word.”‘MAAK DIE FOUT REG’“Ek verstaan nie hoekom ons as raadslede steeds raad soek oor hierdie eenvoudige saak waaraan ons as raad skuldig is nie. Ons is nie eerlik deur ons eie fout reg te stel nie en nou moet ek die slagoffer wees oor hierdie nonsens wat ons geskep het!” lui ’n e-pos deur !Gonteb.Hy het bygevoeg dat die aanstelling van die prokureursfirma, Metcalfe Beukes Prokureurs, “onnodige regskoste vir die raad skep”.!Gonteb het aangeraai dat die raad by die uitspraak van die hooggeregshof hou.“Binne 30 dae sal ons ’n antwoord hê. Al wat gedoen moet word, is om die fout reg te stel – daar is geen raadsbesluit geneem oor die beëindiging van RedForce se kontrak nie.”In ’n e-pos aan die waarnemende uitvoerende hoof het hy aanbevelings gemaak oor die pad vorentoe.“Beëindig Metcalfe se dienste. Maak die openbare kennisgewing op ons briefhoof reg. Jy het nie regsadvies hiervoor nodig nie.“Betrek RedForce vir ’n bespreking, spesifiek die toegeeflikheidskwessie wanneer dit by invorderings kom.“Kry die dienste van ’n ondersoeker om die hele proses van die aanstelling van RedForce te ondersoek, die resultate van so ’n ondersoek sal ’n mate van gemoedsrus vir sommige raadslede en inwoners in die algemeen bring.“Alternatiewelik, nooi MURD of die verkrygingsbeleidseenheid om ondersoek in te stel.”Die Walvisbaai-munisipaliteit het benadruk dat geen aantygings teen die geskorste werknemers gemaak word nie.“Hul skorsing is teweeggebring om ’n volledige en onbelemmerde ondersoek na die aanstelling van RedForce en RedForce se bedrywighede in Walvisbaai moontlik te maak,” lui ’n verklaring.DAGVAARDINGDie verklaring lui verder dat RedForce ’n dagvaarding aan die Walvisbaai-munisipaliteit gaan beteken oor die kansellasie van hul kontrak.“Instruksies is aan Metcalfe Beukes Prokureurs gegee om so ’n saak teen te staan en ’n teeneis teen RedForce in te stel.”RedForce is glo ook daarvan in kennis gestel dat die raad bevestig het dat hulle nie meer munisipale watertoevoer mag afsny, weer aansluit of watermeterlesings mag uitvoer nie.Hulle meen dat dié pligte uitsluitlik die verantwoordelikheid van die munisipale raad is ingevolge die wet op plaaslike owerhede.PROSEDURES ‘NIE GEVOLG’Walvisbaai se burgemeester, Trevino Forbes, het ’n memorandum aan Esterhuizen uitgereik waarin hy beweer dat die korrekte prosedures om !Gonteb en Shidute te skors, nie gevolg is nie.“Ons is aangeraai om die regte prosedures volgens die wet te volg en die saak na die bestuurskomitee te verwys.“Ek voel sterk dat die korrekte proses nie gevolg is nie en vra daarom dat die skorsing van die twee personeellede onmiddellik gestaak word en dat die riglyne volgens die wet gevolg word.”– republikein@republikein.com.na

Walvisbaai-dorpsraad skors twee bestuurders

Kommentaar

Republikein 2025-05-01

Meld asseblief aan om kommentaar te lewer

Walvisbaai-dorpsraad skors twee bestuurders

Kommentaar

Republikein 2025-05-01

Meld asseblief aan om kommentaar te lewer

MELD AAN

Advertensie