Verlate Spitzkoppe-gebou kwel Henties

Inwoners en sake-eienaars van Hentiesbaai het kommer uitgespreek oor veiligheidsrisiko’s ná ’n reeks brande op die perseel van die verlate Spitzkoppe-restaurantgebou in die dorp se sentrale sakekern. 

Die gebou wat al etlike jare leegstaan, word deur nabygeleë eiendomseienaars beskryf as vervalle en toeganklik vir rondlopers. Volgens ’n naburige sake-eienaar is verskeie brande by die eiendom aangemeld, insluitend ’n onlangse voorval waarin die struktuur herhaaldelik in ’n enkele dag aan die brand geraak het.

Jené Nell, ’n sake-eienaar naby die perseel, sê naburige inwoners moes vroeër self ingryp om te keer dat die brand versprei. 

“Ons het op ons dakke ​​met tuinslange gestaan om te keer dat dit versprei.” 

Sy het gesê nooddienste was nie onmiddellik bereikbaar tydens die voorval nie en het bevestig dat amptelike klagtes oor die toestand van die eiendom sedert verlede jaar by die munisipaliteit ingedien is, maar het gesê reaksies was beperk.

“Almal sê net dis private eiendom, hulle kan niks doen nie,” het Nell gesê.

Sy het ook verwys na beweerde tekortkominge in noodreaksie op die vakansiedorp. 

“Nooddienste het die eerste keer opgedaag en die brand nie behoorlik geblus nie. Daarna was dit moeilik om hulle in die hande te kry. Die laaste twee op die skof het gereageer,” het sy gesê.

Volgens reaksie aan die kant van die munisipaliteit is die eienaar van die eiendom ’n Chinese burger met die naam ‘Gudi’ en is hy gekontak. Verdere optrede berus nou by hom. 

 In ’n boodskap wat met inwoners gedeel is, sê die munisipaliteit die eienaar is gekontak en “ons het opgetree volgens wat in ons mandaat is. Nou is dit aan hom oorgelaat om op te tree”.

Die voorsitter van die Hentiesbaai-bestuurskomitee Daniel Wehl, het aan Republikein bevestig die raad is bewus van die voorval. “Ons is bewus daarvan dat die plek gebrand het. Die brandbestrydingskoste moet betaal word, en dit is die verantwoordelikheid van die eienaar,” het hy gesê.

Volgens Wehl sal die munisipaliteit die eienaar amptelik in kennis stel om die perseel skoon te maak.

“Die munisipaliteit sal ’n brief aan die eienaar moet skryf om die puin en afval te verwyder. Ons is besig om die dorp skoon te maak en daar is verskeie plekke waar eienaars aangesê is om hul eiendomme skoon te maak,” het hy gesê.

Wehl het verder bevestig dat ’n beleid oor verwaarloosde eiendomme onlangs opgestel is.

“Ons werk aan ’n beleidsdokument rakende eienaars wat nie hul eiendomme in stand hou nie. Dit is verlede Vrydag gefinaliseer, maar is nog nie voor die raad ter tafel gelê nie,” het hy gesê.

Inwoners voer aan dat die situasie beide ’n gesondheids- en veiligheidsgevaar inhou, veral gegewe die gebou se ligging in die middedorp. Kommer sluit in onwettige besetting, die ophoop van rommel en herhalende brande.

Openbare reaksie op sosiale media was krities oor die huidige stand van sake.

Een inwoner het geskryf: “Ek kan nie glo dat dit so vuil is nie. Waar is die munisipaliteit wat veronderstel is om hierna om te sien?” 

’n Ander het die gebou beskryf as “’n walglike oogseer” en ’n “teelaarde vir moeilikheid”.

Ander het weer die aanspreeklikheid vir die eiendom bevraagteken: “Wanneer ’n probleem in die dorp geopper word, word die moeite en tyd deur inwoners ingesit en dit word verruil vir verskonings.”

Sommige inwoners het strenger afdwinging versoek, insluitend inspeksies en moontlike regstappe teen die eienaar, terwyl ander kommer uitgespreek het oor bestuur en munisipale toesig.

Pogings om verdere kommentaar te bekom, was onsuksesvol. Die waarnemende uitvoerende hoof het teen druktyd nog nie gereageer nie. Die burgemeester, Titus Johannes, het geweier om kommentaar te lewer. ’n Boodskap is ook na ’n kontakpersoon gestuur wat vermoedelik aan die eiendomseienaar, ‘Gudi’, behoort, maar geen reaksie is ontvang nie.

Daar word verstaan ​​dat die eiendom in privaat besit is en dat die eienaar nie in Hentiesbaai gebaseer is nie. Die gebou het vir ’n lang tydperk in onbruik gestaan, met dele wat na bewering struktureel verswak is.

Inwoners doen ’n beroep op duideliker aanspreeklikheid en afdwinging van munisipale verordeninge om verdere voorvalle te voorkom. 

- [email protected]