Usakos-stadion word blink gepoets

Precious Nghitaunapo – Ná jare se verwaarlosing ondergaan die Usakos-stadion, ’n simbool van gemeenskapstrots, uiteindelik broodnodige opknappingswerk. Die stadion het vervalle geraak weens ’n gebrek aan instandhouding en finansiële beperkings. Met hernieude pogings en gemeenskapsondersteuning is die stadion egter nou op die pad na herlewing.Die ministerie van jeug, sport en nasionale diens het N$2 miljoen gedurende die 2022-’23-finansiële jaar bewillig vir die opgradering van die Usakos Jeugsportstadion (Erf 260). Die stadion het lank as ’n spilpunt vir sportbyeenkomste, kulturele vieringe en gemeenskapsbyeenkomste gedien. Die vervalle toestand daarvan is vir talle ’n rede tot kommer, met verbrokkelende infrastruktuur en veiligheidsgevare wat aansienlike uitdagings bied.Mohalle Naruseb, die mede-eienaar van die Usakos-sokkerakademie, sê die opknappings is al lank uitstaande. Naruseb, wat die plaaslike sokkerklub bestuur, sê hulle maak gereeld van die stadion gebruik om te oefen ten spyte van die toestand daarvan.Die span is egter nie in staat om amptelike wedstryde by die stadion aan te bied nie as gevolg van die standaard van die fasiliteite en speel dikwels amptelike wedstryde in Karibib.Naruseb sê die belangstelling in sport het aansienlik in die dorp afgeneem en hy hoop dat die huidige opknappings die inwoners se moraal sal ophef.“Hopelik sal die opgraderings belangstelling in Usakos aanwakker en dat die ondersteuning van die plaaslike span sal groei,” het hy gesê.Die omvang van die opknappings sluit in die herstel van strukturele skade, die opgradering van sitplekke, die verbetering van onder meer toiletgeriewe en van algehele veiligheidsmaatreëls.Fase een het reeds afgeskop en fokus daarop om die ou heining en pale te vervang en die kleedkamers op te knap.Die streek ondervind tans probleme met die standaard van sportvelde, veral in Walvisbaai en Swakopmund, waar die sportvelde vir nasionale ligawedstryde en ander sportkodes gebruik word.Die president van die Namibiese Sokkervereniging, Robert Shoomoshili, sê egter enige opknappingswerk in die sportbedryf moet gevier word.Hy sê dat die Usakos-stadion ná die opgradering voltooi is ook nasionale ligawedstryde sal kan aanbied. Boonop sal die opknappingsprojek na verwagting positiewe rimpeleffekte buite die stadion se grense self veroorsaak.Die stadion sal sportgeleenthede, kulturele vertonings en ander aktiwiteite lok, ekonomiese aktiwiteit aandryf en toerisme in die streek bevorder.Boonop kan verbeterde sportfasiliteite bydra tot die ontwikkeling van plaaslike talent.Usakos se burgemeester, Irene Simeon-Kurtz, sê die projek het in die eerste week van vandeesmaand begin en die regering het die maatskappy Association for Unemployed Artisans in Namibia (AUAN) aangestel.“Die projek het ten minste 30 tydelike werksgeleenthede geskep wat tot groot voordeel vir Usakos is en help met die hoë werkloosheid in die dorp,” sê sy. – republikein@republikein.com.na

Usakos-stadion word blink gepoets

Kommentaar

Republikein 2026-09-18

Meld asseblief aan om kommentaar te lewer

Usakos-stadion word blink gepoets

Kommentaar

Republikein 2026-09-18

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.