Tweede lewe vir Ramatex?

Die burgemeester van Windhoek, Ndeshihafela Larandja, het Vrydag die Ramatex-aanleg in die hoofstad besoek.In ’n sosialemediavrystelling het sy gesê die terreininspeksie is uitgevoer om die huidige toestand en potensiaal van die terrein te bepaal.Die besoek volg op onlangse vergaderings met interne belanghebbendes om die toestand van die perseel te bespreek voordat eksterne partye betrek word, sê sy.Tog lui dieselfde verklaring dat die burgemeester ook geluister het na sekere ontwikkelingsvoorstelle wat spesifiek op die Ramatex-eiendom gefokus is, wat deur verskeie belangstellende besighede ingedien is. Daarna is die terreininspeksie van stapel gestuur.Ter agtergrond brei Larandja uit dat die perseel, wat ongeveer 43 hektaar beslaan, oorspronklik onder 'n 99 jaar-ooreenkoms verhuur is, wat in 2008 geëindig het nadat Ramatex Textiles Namibia onder voorlopige likwidasie geplaas is.“Sedertdien was die hoofstad en die likwidateurs by ’n lang regsproses betrokke, wat nou opgelos is.“Volgens die skikking is die likwidateurs drie jaar gegee om die bestaande pakhuis te verwyder en die grond na sy oorspronklike toestand te herstel. Indien nie, kan die stadsraad ingryp en ’n kontrakteur aanstel om die pakhuis te verwyder,” sê die burgemeester.“Met die sperdatum wat nou verstryk het, hersien die stad die huidige toestand van die eiendom en ondersoek nuwe geleenthede om Ramatex in ’n energieke kommersiële of nywerheidspilpunt te omskep. “Die grond, wat deur Stad Windhoek besit word, hou groot potensiaal in om werksgeleenthede te skep en broodnodige inkomste vir die stad te genereer,” sê Larandja.“Alhoewel geen finale besluit geneem is nie, is hierdie ooreenkomste ’n belangrike stap om Ramatex se ekonomiese potensiaal te ontsluit,” sê sy.Die munisipaliteit se woordvoerder, Lydia Amutenya, waarsku egter dat die proses nog in sy kinderskoene is, met enige voorstelle wat nog voor die stadsraad ter tafel gelê moet word.Sy sê ’n amptelike proses sal van stapel gestuur moet word ingeval die stadsraad besluit om byvoorbeeld voorstelle van sakelui en ander belanghebbendes aan te vra.Die Ramatex-aanleg is die afgelope paar jaar van tyd tot tyd gebruik vir onder meer sekere sport-, vermaaklikheidsgeleenthede, politieke byeenkomste en is ook vir verkiesingsdoeleindes gebruik.Die meerderheid van die pakhuise en ander geriewe is egter in ’n vervalle toestand. – augetto@nmh-hub.com.na

Tweede lewe vir Ramatex?

Kommentaar

Republikein 2026-02-03

Meld asseblief aan om kommentaar te lewer

Tweede lewe vir Ramatex?

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.