Studente vir losprys ontvoer

Tuyeimo Haidula

Misdadigers in die Oshanastreek het skynbaar met nuwe maniere vorendag gekom om “sake te doen” nadat nog ’n student Maandag by die informele nedersetting Omahenene in die Oshakati-Wes-kiesafdeling ontvoer, vir ’n losprys aangehou en beroof is.

Adjudant-offisier Frieda Shikole, die waarnemende polisiewoordvoerder in die Oshanastreek, het gesê ’n saak van roof met verswarende omstandighede is aanhangig gemaak.

Die voorval het omstreeks 18:20 plaasgevind, het sy gesê en bygevoeg die verdagte het die slagoffer ontvoer, haar met ’n mes gedreig en van haar geld en selfoon beroof en aangerand.

In ’n klankgreep wat wyd versprei is, het ’n vrou – glo die slagoffer se tannie – ouers gewaarsku dat die jong vrou gegryp is toe sy van die kampus af op pad was nadat sy eksamen geskryf het.

Die misdadigers bel glo die slagoffers se ouers om geld te eis. Aanvanklik het haar ouers geweier. Die verdagte het toe teruggekap dat hy haar sou verkrag en na Angola sou neem vir mensehandel.

Die ouers het geldprobleme en het familielede om hulp gevra.

Die slagoffer het ligte beserings opgedoen.

DUISENDE GESTUUR

“Na bewering het die slagoffer ’n taxi na die Ongwediva-ingenieurskampus geneem om te studeer, en in die proses is [sy ontvoer] – tot die mate dat geld van haar ouers, familielede en vriende geëis is,” het Shikole gesê.

Sy het gesê die verdagtes het glo die familie gedreig dat hulle die jong vrou aan iemand in Angola sal verkoop as hulle nie die losprys betaal nie.

“Die ouers het – uit vrees – ’n bedrag van N$3 900 gestuur. Toe het die [verdagtes] N$780 uit die slagoffer se rekening geneem, wat altesaam N$4 680 beloop – die selfoon uitgesluit [wat hulle gesteel het], wat N$2 500 werd is,” het sy gesê.

Niemand is tot dusver in verband met dié saak in hegtenis geneem nie, maar ondersoeke duur voort.

SOORTGELYKE VOORVAL

In Oktober is ’n verpleegstudent in Ondangwa na bewering in die Ekuku-omgewing ontvoer en van meer as N$12 000 beroof.

Die polisie het berig dat die 25-jarige vrou ’n taxi, wat drie mans vervoer het, laat stilhou het.

Een van die mans het haar handsak en selfoon gegryp en haar opdrag gegee om haar ma te sê om ’n oorplasing van N$2 000 aan haar te maak, het Thomas Aiyambo, die polisiewoordvoerder, destyds gesê.

Sy het ook opdrag gekry om haar tannie te vra om vir haar N$1 000 te stuur, wat sy ook gedoen het.

Aiyambo sê die mans het toe nog N$2 000 van die slagoffer se ma geëis, terwyl hulle haar met ’n mes gedreig en in die ribbes geslaan het.

Nadat hulle nie nog meer geld uit die slagoffer kon kry nie, het die taxi haar by die dorpie Omayanga afgelaai, waar sy ’n ander taxi na Oshakati geneem het.

“Die taxi was ’n swart Nissan March met ’n Oshakati-registrasienommer, maar die nommerplaat is nie tydens die voorval vasgelê nie. Die slagoffer is van ’n Samsung A30-slimfoon, huissleutels en kontant ter waarde van N$7 300 beroof,” het die polisie gesê.

Geen arrestasies is gemaak nie en die geld is nie teruggevind nie.

WEES VERSIGTIG

Die streekhoof van misdaadondersoeke, adjunkkommissaris Theophilus Kamati, het lede van die publiek gemaan om ekstra versigtig te wees wanneer hulle ’n taxi neem.

Diegene wat taxibestuurders ken, moet reëlings tref om deur bekende mense op- of afgelaai te word, het hy gesê.

“Diegene wat selfone het, moet in die geheim foto’s van die motor neem voordat hulle inklim en dit so gou as moontlik aan hul vriende of kennisse stuur. Hulle moet altyd probeer om kennis te neem van dinge in die motor, kleredrag van die mense in die motor, die model van die motor en enige identifiseerbare items op die motor.”

Intussen betrek die polisiemag die betrokke belanghebbendes om seker te maak dat alle taxi’s op die pad identifiseerbaar is, het Kamati gesê.

– [email protected]