Stappers uit canyon gered

Sewentig van die 96 stappers wat in die Visrivier-canyon weens stygende watervlakke gestrand was, is gister teen druktyd na veiligheid gebring. 

’n Reddingsoperasie wat deur die Namibiese polisie (Nampol) gelei word, het voortgeduur om die oorblywende 26 stappers gister voor sonsondergang uit die spoelkloof te ontruim.

Die ontruiming van die groepe stappers is genoodsaak nadat swaar reënval in die Hardap- en ||Kharasstreek daartoe gelei het dat die Nautedam se sluise oopgetrek moes word. Die gewilde staproete in die canyon is Sondag tydelik gesluit.

ǁKharas se polisiebevelvoerder, komm. Marius Katamila, het laat gistermiddag in ’n onderhoud met Republikein gesê die stappers was deel van nege afsonderlike groepe wat weens swaar reënval en die ooptrek van die Nautedam se sluise nie die kloof kon verlaat nie. 

Volgens hom het tien stappers daarin geslaag om Sondagmiddag ’n uitgangspunt naby een van die kampe te bereik. Dit het 86 mense in die spoelvallei gelaat toe die formele reddingsoperasie gisteroggend begin het.

“Uit die 86 stappers het ons tans 60 mense suksesvol ontruim,” het hy gister teen druktyd gesê.

Nampol se helikopter vir lugondersteuningsdienste wat in Windhoek gebaseer is, het gister die hoofstad met sonsopkoms verlaat. 

Reserwemag- en operasionele lede is ook na Hobas en Ai-Ais ontplooi om met die ontruimingsoperasie te help.

Katamila het bevestig dat die 60 mense wat per helikopter ontruim is, veilig en ongedeerd is.

“Dit gaan goed met hulle. Sommige is ’n bietjie getraumatiseerd, maar almal is oukei,” het hy gesê.

Die operasie het gistermiddag voortgeduur, maar Katamila het gesê helikoptervlugte in die spoelvallei sal met die laaste lig gestaak moet word. Afhangende van hoeveel stappers voor dan bereik kon word, sal die ontruimingsoperasie vandag voortduur.

Katamila was gister hoopvol dat die polisie die oorblywende 26 stappers veilih voor donker sou ontruim. Hy het kommer uitgespreek oor koue oornagtoestande en voortgesette stygende watervlakke in die spoelvallei. 

“Die water in die kloof kan snags baie koud word. In die winter kan uiterste temperature ook ervaar word,” het hy gesê. 

Volgens Katamila is baie van die stappers ervare en het toegang tot veiligheidsinligting vir die roete gehad. 

Die Namibia Wildlife Resorts (NWR) het Sondag die staproete met onmiddellike effek tydelik gesluit en gewaarsku dat toestande steeds onveilig is.

Die sluiting sal tot verdere kennisgewing van krag bly, met die publiek wat versoek is om die roete te vermy totdat owerhede dit veilig verklaar.

– [email protected]