Stakende werkers hou Rehoboth gyselaar

“’n Staking is ’n staking. . . Ek sal dit nie sabotasie noem nie.”

Só het mnr. Lesley Mosegedi, woordvoerder van die nagenoeg 90 stakende werkers van die dorpsraad op Rehoboth, gister gereageer op beskuldigings dat hulle doelbewus stappe doen om water- en elektrisiteitsvoorsiening aan sekere woonbuurte op die dorp te verhinder.

Verder maak die staking dit vir minstens 40 persent van die dorp se 60 000 inwoners wat vooraf vir water betaal, onmoontlik om toegang tot dié diens te kry.

Mnr. Justin Coetzee, een van die dorp se sewe raadslede, het aan Republikein gesê die stakende werkers hou die dorp gyselaar en saboteur dienslewering.

Hy sê Blok F was sonder water en nadat dit aangeskakel is, het die stakers dit weer gesny.

“Dit is eindelik danksy gemeenskapsingryping weer aan, maar die stakers verhoed die aanskakeling van die elektriteitstoevoer na Blok C en Blok D. Die stakers wil nie die sleutel gee wat ons nodig het om weer die krag aan te skakel nie,” sê hy.

Die Namibiese Vakbond vir Staatsdienswerkers (Napwu) se lede by die Rehoboth-dorpsraad staak sedert 29 Junie omdat die ministerie van stedelike en landelike ontwikkeling nie die loon- en salarisverhoging van 4% wat hulle eis, wil goedkeur nie.

Dit is reeds einde verlede jaar deur die bestuurskomitee goedgekeur, maar minister Erastus Uutoni het op 16 Junie vanjaar skriftelik opdrag gegee dat nie een van die 58 plaaslike owerhede vanjaar verhogings mag toestaan nie.

Die rede daarvoor is die groot bedrae geld wat plaaslike owerhede aan die nasionale krag- en watervoorsieners, NamPower en NamWater, verskuldig is.

Volgens Coetzee skuld Rehoboth se dorpsraad N$150 miljoen aan NamPower en N$30 miljoen aan NamWater.

UPM BEKOMMERD OOR SITUASIE

Intussen het die United People’s Movement (UPM) se mnr. Jan van Wyk gesê dié party is bekommerd oor die situasie op Rehoboth en veroordeel die feit dat die lynministerie nie betyds ingegryp en die geskil besleg het voordat dit in ’n staking oorgegaan en die inwoners van die dorp verontrief het nie.

Die UPM het ook in ‘n verklaring die burgemeester, mnr. Enrico “Toes” Junias, se besoek aan Turkye en twee ander raadslede, mee. Amanda Groenewald en Joey Hammerslaght, se Europese vakansie terwyl Rehoboth soos die spreekwoordelike Rome brand, veroordeel.

Junias, wat gister weer terug was op kantoor, het in ’n plasing op Facebook teruggekap na Van Wyk en gesê sy oorsese besoek “om geld vir die dorp te werf”, is ’n maand gelede al gereël toe daar nog geen sprake van ’n staking was nie.

Hy het gistermiddag in ’n telefoniese onderhoud aan Republikein gesê hy was intussen met Uutoni in gesprek, wat dit duidelik gemaak het die ministerie sal nié die verhoging toestaan nie, al is dit deur die bestuurskomitee goedgekeur.

“Ons het ’n dooiepunt bereik en ek onderhandel met die stakers oor die lewering van dienste. Daar is inwoners wat al van verlede Woensdag af nie water het nie en ons kan dit nie toelaat nie.”

Junias sê die stakers kan nie inwoners se reg op dienste as ’n bedingingsinstrument gebruik nie.

Mosegedi hou vol die ministerie kan nie die verhoging afkeur nie, aangesien dit vir die 2021-’22-boekjaar is en die minister eers in Junie ’n stokkie voor verhogings gesteek het.

– [email protected]