Stakende skoonmakers se pakket is ‘billik’

Stad Windhoek (CoW) het die huidige salarisse van skoonmakers met vastetermyn-dienskontrakte verdedig en sê hul totale vergoeding van N$5 095,70 per maand is billik. Volgens die munisipaliteit weerspieël dit jare van progressiewe verbetering in diensvoorwaardes. Dit kom te midde van ’n wettige staking deur werknemers in die afdeling vir vaste-afvalbestuur wat op 9 Oktober 2025 begin het ná geskille oor salarisse en voordele. Die stakende werkers eis dat hul pakkette tot N$8 000 verhoog word. In ’n verklaring wat CoW se kommunikasie-afdeling verlede week uitgereik het, sê die munisipaliteit hulle het die staking verwag en noodmaatreëls ingestel om enige ontwrigtings met vullisverwydering, strate vee en algemene netheid oraloor die hoofstad te beperk. Die munisipaliteit sê hy respekteer die werknemers se grondwetlike reg om te staak, terwyl CoW verseker dat noodsaaklike dienste steeds gelewer word.Volgens die verklaring bestaan die huidige totale vergoedingspakket vir werknemers in verskillende gebiede uit ’n basiese salaris van N$3 300, ’n vervoertoelaag van N$800, ’n pensioentoelaag van N$716, ’n mediese toelaag van N$250 en ’n bydrae van N$29,70 deur die werkgewer.Die huidige betalingstruktuur weerspieël die munisipaliteit se voortgesette verbintenis tot die welstand van sy werksmag, volgens die stadsvaders. “Oor die jare is die diensvoorwaardes van vastetermyn-kontrakwerkers progressief verbeter,” lui die verklaring.Die munisipaliteit sê die stadsraad het in 2018 besluit om dié werknemers intern aan te stel deur die aanvaarding van ’n alternatiewe sakemodel wat die gebruik van derdepartykontrakteurs vervang het. Die besluit het volgens die verklaring gelei tot verbeterde werksomstandighede en beter sosioëkonomiese beskerming. Alhoewel beide partye tot dusver by die stakingsreëls gehou het waarop daar ooreengekom is, sê CoW dit is betreurenswaardig dat “die voortgesette pogings en toewyding aan werknemers se welstand blykbaar oorskadu is deur eksterne invloede wat moontlik nie in lyn is met die beste belange van die werknemers nie”.Volgens die verklaring skakel die bestuur steeds konstruktief met die werknemers deur hul verteenwoordiger, John Paporo. Dit sluit duidelike protokol vir kommunikasie in om deursigtige en tydige gesprekke te verseker. Die munisipaliteit het die nuwe eise wat die werknemers ingedien het vir loonverhogings en bykomende voordele ontvang en sal dit later vandeesmaand aan die raad voorlê vir oorweging.Volgens die stadsvaders het soortgelyke voorstelle in die verlede tot betekenisvolle verbeterings gelei, insluitend salarisaanpassings asook pensioen- en mediesefondstoelaes. Die munisipaliteit het sy verbintenis herhaal om in goeder trou met werkers te skakel, gelei deur wedersydse respek en konstruktiewe gesprekke, om ’n vriendskaplike oplossing te bereik wat werknemers se welstand met voortgesette dienslewering balanseer.Terwyl die staking voortduur, word inwoners aangeraai om behoorlike afvalverwyderingspraktyke na te kom en die onwettige storting van vullis te vermy om netheid oraloor Windhoek te help handhaaf.“Ons doel is om ’n vriendskaplike oplossing te bereik wat beide werkers se welstand en noodsaaklike dienslewering aan inwoners beskerm,” lui die verklaring. – elizabethknmh@gmail.com

Stakende skoonmakers se pakket is ‘billik’

Kommentaar

Republikein 2025-10-22

Meld asseblief aan om kommentaar te lewer

Stakende skoonmakers se pakket is ‘billik’

Kommentaar

Republikein 2025-10-22

Meld asseblief aan om kommentaar te lewer

MELD AAN

Advertensie