Stadsvaders erken foute met rekeninge

Die Windhoekse munisipaliteit het bevestig dat ten minste 387 munisipale rekeninge negatief geraak is deur ‘n foutiewe rekeningstelsel, ná maande van openbare druk en protesoptogte deur inwoners.In reaksie op stygende frustrasie van ’n groep belastingbetalers en inwoners het die munisipale woordvoerder, Harold Akwenye, gesê die munisipaliteit het geverifieer dat ’n beduidende aantal rekeninge deur onreëlmatighede in sy faktuurproses geraak is.“Die munisipaliteit het op bewerings gereageer dat sowat 387 rekeninge moontlik negatief deur onreëlmatighede in die stelsel geraak is. ’n Verifiëringsproses is uitgevoer en die geraakte rekenings is geïdentifiseer,” het Amukwenya aan Network Media Hub (NMH) gesê.“Regstellende stappe, wat rekonsiliasies en wysigings van rekeninge insluit, word tans geïmplementeer om akkuraatheid en billikheid te verseker,” het hy gesê.Die erkenning volg voor ’n beplande protesoptrede en oorhandiging van ’n klagskrif op 28 Julie by die kliëntedienssentrum in Katutura. Inwoners dring aan op antwoorde en regstellings en sê die foute in die stelsel het hulle finansieel negatief geraak, eiendomstransaksies ontwrig en vertroue in die munisipaliteit se administrasie ondermyn.VERTROUEVolgens die gemeenskapsleier Shaun Gariseb, wat die protesoptog lei, sê geraakte rekeninge sluit huiseienaars in wie se skuld glo oornag sonder enige verduideliking die hoogte ingeskiet hetVolgens Gariseb beweer inwoners in verskeie gevalle die balans op hul rekeninge het van ’n paar duisend dollar tot honderde duisende dollars sonder waarskuwing of verduideliking gestyg.“Vyftien van diegene wat geraak is, is hof toe omdat hulle nie weens hierdie opgeblaasde bedrae klaringsertifikate kon kry nie. Hierdie is nie net syfers op papier nie, dit is mense se lewensbestaan wat ontwrig is,” het Gariseb gesê.Hy het ook beweer hy dra kennis van ’n beweerde geval van ’n regeringsministerie wie se munisipale skuld van N$1,2 miljoen tot net N$40 000 geval het sonder enige bewys van betaling.“Dit alleen wys vir jou hoe onbetroubaar die stelsel is,” het Gariseb gesê.OUDITDie munisipaliteit het verder gesê ’n onafhanklike oudit in die rekeningstelsel is in opdrag van Deloitte voltooi.Dié bevindinge is egter nog nie aan die publiek vrygestel nie.“Die oudit ondergaan tans ’n interne oorsig en bespreking op raadsvlak,” het Akwenye verduidelik.“Wanneer die nodige interne prosesse gefinaliseer is in ooreenstemming met raadsresolusies en bestuursprotokol, sal die munisipaliteit ’n openbare opsomming van die sleutelbevindinge en voorstelle verskaf.”Inwoners is vir nou egter steeds skepties. Gariseb beweer die verslag word na bewering bewustelik weerhou, ten spyte van die feit dat dit vroeër vanjaar deur Fanuel Maanda in sy hoedanigheid as waarnemende uitvoerende hoof onderteken is.“Hulle sit op ’n dokument wat bevestig wat ons reeds lankal weet, dat die rekeningstelsel foutief is en honderde mense benadeel het,” het hy gesê.REDFORCEDie beswaarde inwoners dring ook aan op duidelikheid oor die toekoms van die munisipaliteit se skuldinvorderingsooreenkoms met RedForce Debt Management.Die kontrak wat teen die einde van Julie verstryk, het onder die loep gekom weens die beweerde aggressiewe insamelingspraktyke en gebrek aan deursigtigheid in die verlenging van die kontrak.Hoewel Akwenye bevestig het dat die hersiening van die kontrak voortduur, is geen besluit nog geneem of dit hernu of beëindig gaan word nie.“Die oomblik wanneer alle oorwegings, insluitend die terugvoering van rolspelers en regsadvies oorweeg is, sal die raad hieroor vergader en vervolgens die uitkoms kommunikeer,” het hy gesê.Gariseb sê die vereniging sal die komende protesoptrede gebruik om nie net ’n klagskrif te oorhandig nie, maar ook om op persoonlike antwoorde van beide die hoofstad se burgemeester en die uitvoerende hoof aan te dring.“Die munisipaliteit kan nie langer agter interne oorsigte en prosesse agter geslote deure skuil nie. Ons verwag ten volle openbaarmaking en konkrete oplossings, nie vae beloftes nie,” het hy gesê.– republikein@republikein.com.na

Stadsvaders erken foute met rekeninge

Kommentaar

Republikein 2025-07-14

Meld asseblief aan om kommentaar te lewer

Stadsvaders erken foute met rekeninge

Kommentaar

Republikein 2025-07-14

Meld asseblief aan om kommentaar te lewer

MELD AAN

Advertensie